Almaniyada keçirilən futbol üzrə Avropa çempionatının B qrupunda ilk tura yekun vurulub.
Senzor.az bildirir ki, turnirin son qalibi İtaliya millisi Albaniya yığması ilə qarşılaşıb.
Görüşdə hesabı albaniyalılar açıblar. 23-cü saniyədə Nedim Bayrami fərqlənib. İtaliya yığması cəmi 10 dəqiqə sonra tarazlığı bərpa edib. Alessandro Bastoni hava ötürməsini dəqiq baş zərbəsi ilə tamamlayıb. 16-cı dəqiqədə isə Nikola Barella uzaq məsafədən qüvvətli zərbə ilə İtaliya seçməsini önə keçirib. Bu, qarşılaşmada vurulmuş sonuncu qol olub. Beləliklə, son Avropa çempionu turnirə qələbə ilə başlayıb.
Qeyd edək ki, bu qrupun ilk matçında İspaniya millisi Xorvatiyanı 3 cavabsız qolla üstələyib.
**21:57 (15.06.2024)
İspaniya Xorvatiyaya üç cavabsız qolla qalib gəldi
İyunun 15-də Futbol üzrə Avropa çempionatında daha bir oyun keçirilib.
Senzor.az bildirir ki, B qrupunun ilk matçında İspaniya və Xorvatiya komandaları üz-üzə gəlib. Görüş ispanların 3:0 hesablı qələbəsi ilə yekunlaşıb.
Qolları Alvaro Morata, Fabian Ruiz və Dani Karvaxal vurublar.
B qrupunun ikinci oyunu İtaliya ilə Albaniya yığmaları arasında olacaq. Görüş Bakı vaxtı ilə saat 23:00-da başlayacaq.
**19:16
Günün ilk oyununda İsveçrə qələbə qazandı
Bu gün futbol üzrə Avropa çempionatında qrup mərhələsinin I turu çərçivəsində Macarıstan və İsveçrə yığmaları üz-üzə gəlib.
Senzor.az bildirir ki, A qrupunun ikinci oyununda isveçrəlilər 3:1 hesabı ilə qələbə qazanıblar.
İsveçrə seçməsinin heyətində qolları Kvadvo Duah, Mişel Aebişer və Bril Embolo vurublar. Macarıstanın yeganə topuna isə Bernabaş Varqa imza atıb.
Günün digər iki görüşü isə B qrupunda baş tutacaq. İspaniya Xorvatiya, İtaliya isə Albaniya ilə qarşılaşacaq. Görüşlər müvafiq olaraq Bakı vaxtı ilə saat 20:00 və 23:00-da başlayacaq.
Qeyd edək ki, dünən turnirin açılış oyununda Almaniya Şotlandiyanı 5:1 hesabı ilə məğlub edib.
**09:29
Bu gün Avropa çempionatında daha üç matç keçiriləcək.
Senzor.az bildirir ki, qarşılaşmalar A və B qruplarında olacaq.
A qrupunda Macarıstan və İsveçrə komandaları üz-üzə gələcək. Görüş Bakı vaxtı ilə saat 17:00-da start götürəcək.
Günün digər iki görüşü isə B qrupunda baş tutacaq. İspaniya - Xorvatiya və İtaliya - Albaniya matçları oynanılacaq. Görüşlər müvafiq olaraq Bakı vaxtı ilə saat 20:00 və 23:00-da başlayacaq.
Qeyd edək ki, turnirin açılış oyununda ötən gün Almaniya Şotlandiyanı 5:1 hesabı ilə məğlub edib.
