Almaniyada keçirilən futbol üzrə XVII Avropa çempionatının C qrupunda ilk tura yekun vurulub.
Senzor.az bildirir ki, turnirin favoritlərindən sayılan İngiltərə Serbiya yığması ilə qarşılaşıb.
Qelzenkirxen şəhərinin “Arena AufSchalke” stadionunda keçirilən qarşılaşma ingilislərin hücumları ilə başlayıb. Nəticədə britaniyalılar hesabı aça bilib. Matçın 13-cü dəqiqəsində Cud Bellinqem fərqlənib - 1:0. Bundan sonra bərabərlik axtarışında olan serblər bir neçə dəfə Cordan Pikfordu narahat etsələr də əlcək ustası qapısını toxunulmaz saxlayıb.
Nəticədə Qaret Sautgeytin komandası minimal hesablı qələbə ilə qrupda liderliyə yüksəlib. Qeyd edək ki, C qrupunun digər görüşündə Danimarka Sloveniya ilə 1:1 hesablı nəticəyə razılaşıb.
Qeyd edək ki, AVRO-2024 iyulun 14-də başa çatacaq.
**21:57(16.06.2024) 
Almaniyada təşkil olunan futbol üzrə Avropa çempionatında növbəti oyun keçirilib.
Senzor.az bildirir ki, C qrupunda Sloveniya və Danimarka yığmaları üz-üzə gəlib. Qarşılaşma 1:1 hesablı heç-heçə ilə yekunlaşıb.
Hesabı 17-ci dəqiqədə Danimarkanın heyətində Kristian Eriksen açıb. Sloveniyanın qolunu isə 77-ci dəqiqədə Erik Yanza vurub.
C qrupunun ikinci oyunu İngiltərə və Serbiya arasında olacaq. Görüş 23:00-da başlayacaq.
**18:56 
Almaniyada təşkil olunan futbol üzrə Avropa çempionatında növbəti oyun keçirilib.
Senzor.az bildirir ki, günün ilk matçı D qrupunda Polşa və Niderland yığmaları arasında olub. Qarşılaşma niderlandlıların 2:1 hesablı qələbəsi ilə yekunlaşıb.
Hesabı Polşanın heyətində 16-cı dəqiqədə Adam Buksa açıb. 29-cu dəqiqədə Kodi Qapko hesabı bərabərləşdirib. Matçın yekun nəticəsini 83-cü dəqiqədə Vout Veqorst müəyyənləşdirib.
Günün digər iki oyunu isə C qrupunda reallaşacaq. Danimarka Sloveniyanı, İngiltərə isə Serbiyanı sınağa çəkəcək. Görüşlər müvafiq olaraq, saat 20:00 və 23:00-da başlayacaq.
**09:56
Bu gün futbol üzrə Avropa çempionatının qrup mərhələsinin I turu çərçivəsində daha üç görüş keçiriləcək.
Senzor.az bildirir ki, üçüncü oyun günündə D və C qrupunda oyunlar reallaşacaq.
Günün ilk matçı D qrupunda gerçəkləşəcək. Hamburq şəhərində Polşa və Niderland milliləri üz-üzə gələcəklər. Qarşılaşma saat 17:00-da başlayacaq.
C qrupunun ilk görüşü isə Ştutqartda baş tutacaq. Saat 20:00-da start fiti səslənəcək oyunda Sloveniya və Danimarka yığmaları qarşılaşacaqlar.
Günün son qarşılaşması da eyni qrupda oynanılacaq. Helzenkirhen şəhərində, saat 23:00-da start götürəcək matçda Serbiya və İngiltərə seçmələri güclünü ayırd etməyə çalışacaqlar.
