Cəbrayıl və Qubadlı rayonlarında kəndlərin layihələndirilməsinə başlanılıb.
Senzor.az xəbər verir ki, bunu Prezidentin Cəbrayıl, Zəngilan və Qubadlı rayonlarında xüsusi nümayəndəsi Vahid Hacıyev bildirib. Onun sözlərinə görə, Cəbrayıl və Qubadlıda kəndlərin ilkin layihəsi formalaşdırılıb. Belə ki, hər rayonda ən azı 2 kəndin layihəsi hazırlanmalıdır:
"Amma bu il daha çox kəndlərin layihələndirilməsi həyata keçiriləcək. Bütün bunlar mərhələli şəkildə olmalıdır. Tikinti işləri azı il yarım çəkəcək. Ümumilikdə bu ərazilərin tikintisi və sakinlərin köçürülməsi 2022-2026-cı il Dövlət Proqramı çərçivəsində reallaşacaq. Bu illər ərzində minlərlə insanın köçürülməsi planlaşdırılır".
**14:11
Fevral ayının axırı, mart ayının ilk həftələrində Zəngilan rayonunun Ağalı kəndinə daha 20 ailə köçürüləcək.
Bu barədə jurnalistlərə Şərqi Zəngəzur iqtisadi rayonuna daxil olan Cəbrayıl, Qubadlı və Zəngilan rayonlarında Azərbaycan Respublikası Prezidentinin xüsusi nümayəndəsi Vahid Hacıyev deyib.
Onun sözlərinə görə, 2022-ci il ərzində Zəngilan rayonu Ağalı kəndinə 66 ailə, 326 nəfər artıq köçüb və onlar orada yaşayır, işləyirlər.
"2023-cü ildə də növbəti köç gözlənilir. İki mərhələdən ibarət olan köç artıq bu ayın axırı, mart ayın ilk həftələrində həyata keçiriləcək", - Vahid Hacıyev qeyd edib .
O əlavə edib ki, evlərin tikintisi artıq başa çatıb və onlar öz sakinlərini gözləyirlər: “Ağalı kəndində bütün infrastruktur və xidmət strukturları, sahələri artıq fəaliyyət göstərir və buranın sakinləri bu sahələrdə çalışır”.
