Pentaqona məxsus sənədlərin sızması nəticəsində ABŞ-ın Ukrayna Prezidenti Volodimir Zelenskini izlədiyini əks etdirən sənəd yayımlanıb.

Bu barədə CNN məlumat yayıb.

CNN-in bu sənədə istinadən verdiyi məlumata görə, Zelenskinin çevrəsi bu casusluq faktında heç bir qəribəlik görmür, lakin informasiyanın sızmasından məyusdur.

ABŞ-ın kəşfiyyat hesabatında deyilir ki, Zelenski fevralın sonunda guya Rusiyanın Rostov vilayətindəki rusiyalı hərbçilərin toplandığı yerlərə pilotsuz təyyarələrlə zərbə endirməyi təklif edib. Zelenski bunu onunla izah edib ki, Ukraynanın bu qədər uzaq məsafəyə uça biləcək uzaqmənzilli silahları yoxdur.

Hesabatda Ukrayna liderinin danışıqları barədə ələ keçirilən məlumatlar yer alıb. Milli Təhlükəsizlik Agentliyi hesabatı “elektron siqnallar və rabitə sistemlərindən əldə edilən kəşfiyyat məlumatları” kimi təsnifatlandırıb.

Bu, ABŞ-ın Ukraynaya uzaqmənzilli raket sistemləri göndərmək istəməməsi ilə bağlı açıq bəyanatlarına aydınlıq gətirir. Belə ki, ABŞ Kiyevin bunlardan Rusiya daxilində zərbələr üçün istifadə edəcəyindən qorxur. Amma Ukrayna söz verib ki, bunun üçün ABŞ-ın verdiyi silahlardan istifadə etməyəcək.

Başqa bir kəşfiyyat hesabatında deyilir ki, Çin Ukraynanın Rusiyanın daxilindəki hədəflərə zərbələrini fürsət kimi dəyərləndirə və bundan NATO-nu təcavüzkar kimi göstərmək üçün istifadə edə bilər. Eyni zamanda da hücumları əhəmiyyətli hesab edərsə, Rusiyaya yardımını artıra bilər.

Buna baxmayaraq, Ukrayna Prezident Ofisi rəhbərinin müşaviri Mixail Podolyak bildirib ki, onun fikrincə, dərc edilmiş sənədlər həqiqəti əks etdirmir və Ukraynanın real planları ilə heç bir əlaqəsi yoxdur. O qeyd edib ki, bu sənədlər Rusiya tərəfindən yayılıb və böyük həcmdə uydurulmuş məlumatlara əsaslanır.