Prezident İlham Əliyevin tapşırıqlarına uyğun olaraq ölkə qarşısında duran vəzifələrin icrası üçün 2023-cü ilin dövlət büdcəsinə dəyişiklik edilməsi zərurəti yaranıb.
Senzor.az bildirir ki, bunu jurnalistlərə açıqlamasında maliyyə naziri Samir Şərifov deyib.
“Əsas istiqamətləri Prezident öz çıxışında göstərib. Bunlar Böyük Qayıdış proqramına uyğun layihələrin maliyyələşdirilməsini sürətlə həyata keçirmək, eləcə də ölkənin müdafiə qabiliyyətinin gücləndirilməsi ilə bağlıdır. Bunun üçün də əlavə vəsaitə ehtiyac var. Odur ki, büdcəyə yenidən baxılması nəzərdə tutulub. Bundan başqa digər məsələlər də dəyişikliklərdə əksini tapacaq”, - deyə o qeyd edib.
Maliyyə naziri 2023-cü ilin dövlət büdcəsinə dəyişikliklərin Milli Məclisə təqdim olunacağı vaxtı da açıqlayıb. O bildirib ki, qanunvericiliyə uyğun olaraq belə dəyişikliklər mayın 15-dən tez təqdim edilmir: "Biz bu təqvimə riayət edəcəyik".
