Türkiyədə keçirilən prezident seçkilərində səslərin sayılması prosesi başa çatıb. Rəcəb Tayyib Ərdoğan 49,35 faiz, Kemal Kılıçdaroğlu 45 faiz səs toplayıb.
TRT telekanalı xəbər verir ki, sağçı ATA ittifaqının namizədi Sinan Oğan 5,22 faiz səs qazanıb.
Seçici fəallığı Türkiyə üçün rekord - 88,84 faiz təşkil edib. MSK-nın məlumatına görə, namizədlərə verilmiş 53,9 milyon səsdən bir milyondan çoxu etibarsız sayılıb.
Səslərin 99,9 faizi sayıldıqdan sonra Ədalət və İnkişaf Partiyasının başçılıq etdiyi Cumhur İttifaqı parlament seçkilərində üstünlük qazanaraq 600 mandatdan 321-nə yiyələnib. Millət İttifaqı parlamentdə 266 yerə sahib olub.
Prezident seçkilərinin mayın 28-nə təyin olunmuş ikinci turunda qalib sadə səs çoxluğu ilə müəyyən ediləcək. Analitiklər hazırkı dövlət başçısı Rəcəb Tayyib Ərdoğanın şanslarını yüksək qiymətləndirirlər.
**09:28
Türkiyədə seçki qutularının 99.99 faizinin açılmasından sonra “Cümhur İttifaqı”nın namizədi, hazırkı prezident Rəcəb Tayyib Ərdoğan 49,35 faiz, “Millət İttifaqı”nın namizədi Kamal Kılıçdaroğlu 45 faiz, ATA İttifaqının namizədi Sinan Oğan 5,22 faiz, Məmləkət Partiyasının sədri Muharrem İncə 0,43 faiz (seçkilərə üç gün qalmış namizədliyini geri götürüb – red.) səs qazanıb.
TRT xəbər verir ki, parlament seçkilərində nəticələrə görə, “Cümhur İttifaqı” 49,31 faiz, “Millət İttifaqı” 35,19 faiz, “Əmək və Azadlıq İttifaqı” 10,51 faiz, “Ata İttifaqı” 2,46 faiz, “Sosialist Güc Birliyi” 0,29 səs toplayıb.
Qeyd edək ki, prezident seçkilərinin ilk turunda namizədlərin heç biri 50 faizdən çox səs toplaya bilməsə, mayın 28-də səsvermənin ikinci turu keçiriləcək.
Həmçinin Türkiyə Böyük Millət Məclisinə 87 seçki dairəsində 600 millət vəkili seçiləcək. Seçkilərdə 24 partiya və 151 müstəqil namizəd iştirak edib.
