Ermənistan təhlükəsizlik şurasının keçmiş katibi David Şahnazaryan Qarabağla bağlı diqqətçəkən iddia irəli sürüb.

Publika.az xəbər verir ki, D.Şahnazaryan Azərbaycanın Qarabağdakı erməni əhalisi ilə bağlı proqram hazırladığını iddia edir.

“Rəsmi Bakı Qarabağ və orada yaşayan erməni əhalisinin Azərbaycana tam inteqrasiyasını əhatə edən proqram hazırlayıb. Bu, “yol xəritəsi”dir. Proqram 4 mərhələdən ibarətdir.

1. Sənədlərin Azərbaycan pasportu ilə dəyişdirilməsi, yəni ermənilərin pasportlaşdırılması;

2. Qarabağda Azərbaycan manatının dövriyyəyə buraxılması;

3. Qarabağdakı silahlıların tamamilə tərk-silah edilməsi və ləğv olunması;

4. Hakimiyyətin tamamilə Azərbaycan hökumətinə verilməsi”, - deyə o,  iddiasında bildirib.

Qeyd edib ki, digər detalları açıqlamaq istəmir. Lakin əlavə edib ki, bu “yol xəritəsi”nin həyata keçirilməsi üçün 12 ay müddət nəzərdə tutulub, hər mərhələnin başa çatması 3 ay ərzində edilməlidir.

D.Şahnazaryan qeyd edib ki, Azərbaycanın bu proqramı Ermənistan hakimiyyətinə göndərdiyinə dair onda məlumat var.

“Bilirəm ki, Ermənistan hakimiyyəti də bu proqramı “artsax hakimiyyətinə” (separatçılar) verməlidir”, - o vurğulayıb.