Səudiyyə Ərəbistanının Həcc və Ümrə Nazirliyi Həcc ziyarəti ilə bağlı xəbərdarlıq edib.
Senzor.az yerli KİV-ə istinadən bildirir ki, Nazirlik zəvvarlara saxta şirkətlərin qurbanı olmamağı və müqəddəs səfərlərini yalnız səlahiyyətli şirkətlər vasitəsilə bron etməyi tövsiyə edib.
Qeyd edilib ki, Həcc ziyarətinin müvafiq icazə olmadan həyata keçirilməsi qanun pozuntusudur. Nazirlik bildirib ki, Səudiyyə Ərəbistanında Həcc mərasimləri üçün bronlar rəsmi internet saytı və “Nusuk” proqramı vasitəsilə həyata keçirilir.
Şirkət əlavə edib ki, Avropa, ABŞ və Avstraliyadan olan zəvvarlar Həcc ziyarətini “Nusuk” platforması vasitəsilə bron edə bilərlər, İslam ölkələrindən bronlar isə xüsusi bron ofisləri tərəfindən həyata keçirilir.
Nazirliyin rəsmi mənbəsi bu il Həcc ziyarətinə getmək niyyətində olan insanlara müxtəlif ölkələrdə sosial şəbəkələrdə yayılan Həcc dələduzluğu kampaniyaları ilə bağlı xəbərdarlıq edib. Bildirilib ki, Nazirlik şirkətlərin reklamlarını və kampaniyalarını diqqətlə izləyir, həmçinin sosial şəbəkələrdə saxta hesabları aşkar edir.
Mənbənin sözlərinə görə, insanların Həcc ziyarətini şirnikləndirici qiymətlərlə təşkil edəcəklərinə dair yalan vədlər verən bu cür aldadıcı kampaniyalara və şirkətlərə qarşı ayıq olmaları vacibdir.
