Ukraynada Ali Rada ikinci cəhddən Prezident Volodimir Zelenskinin səlahiyyətlərinin uzadılmasını dəstəkləyib.
Bu barədə deputat Yaroslav Jeleznyak özünün "Telegram" kanalında məlumat verib.
O qeyd edib ki, parlament Ukraynada demokratiyanın dəstəklənməsi, o cümlədən Zelenskinin səlahiyyətləri və münaqişə başa çatdıqdan sonra seçkilərin keçirilməsi ilə bağlı 13041 nömrəli qərar üçün səs verib.
Qərarı 268 deputat dəstəkləyib. Bundan əvvəlki gün bu sənəd lazım olan səs sayını toplaya bilməmişdi.
Sənəddə qeyd olunur ki, hərbi vəziyyətin tətbiqi, Ukrayna Konstitusiyasına uyğun olaraq, seçkilərin keçirilməsini mümkünsüz edir. Eyni zamanda, parlament Ukrayna xalqının münaqişə bitdikdən sonra seçkilərə hazırlaşmaq istəyində birliyini vurğulayıb.
Xatırladaq ki, bir gün əvvəl Zelenskinin dəstəyi üçün 218 deputat səs vermişdi ki, bu da tələb olunan 226 səsdən az idi. Qeyd edək ki, Radada səsvermə proseduru qonaqların - Avropa komissarlarının iştirakı ilə keçirilib.
V.Zelenski 2019-cu il mayın 20-də prezident seçilib. Onun səlahiyyət müddəti 2024-cü ilin mayında başa çatmalı idi, lakin Rusiya ilə davam edən müharibə prezident seçkisinin keçirilməsinə mane oldu. Səlahiyyət müddətinin bu qədər uzadılmasına görə Zelenski Leonid Kuçmadan sonra Ukrayna tarixində ən uzun müddət vəzifədə qalan ikinci prezidentdir.
**10:58
Ukrayna parlamenti (Ali Rada) dünən Volodimir Zelenskinin yalnız sülh bərqərar olduqdan sonra keçirilə biləcək yeni seçkilərə qədər ölkənin legitim prezidenti olaraq qalması barədə qərar qəbul edə bilməyib. Bləliklə də, onun legitimliyi sual altına düşüb.
Senzor.az yerli KİV-ə istinadən bildirir ki, “Səs” partiyasının deputatı Yaroslav Jeleznyakın və “Avro Həmrəylik” partiyasının deputatı Aleksey Qonçarenkonun dediklərinə görə, qətnaməni qəbul etmək üçün 226 səs zəruri olduğu halda, onu 218 deputat dəstəkləyib.
“Ali Radanın Ukraynada demokratiyanın dəstəklənməsinə dair bəyanatı iflasa uğradı. Səsə qoyulan qətnamənin mətnində Zelenskinin prezidentin səlahiyyətlərini həyata keçirməyə davam etməli olduğu bildirilir. Amma parlament vurğulayır ki, Volodimir Zelenkski Uraynanın yeni seçilmiş prezidenti vəzifəsini icra edənə qədər öz səlahiyyətlərini yerinə yetirməlidir”, - Yaroslav Jeleznyak öz Telegram-kanalında yazıb.
Sənəddə deyilirdi ki, seçkilər hərbi vəziyyət dövründə təşkil edilərsə və keçirilərsə, seçki hüququnun bütün milli və beynəlxalq prinsiplərinə əməl edilməyəcək və bu, belə seçkiləri 2024-cü ilin martında Rusiyada Vladimir Putinin yenidən təyin edilməsinə bənzər bir məzhəkəyə çevirəcək.
Həmçinin, Prezident Volodimir Zelenskinin mandatının Ukrayna xalqı və Ali Rada tərəfindən şübhə altına alınmadığı bildirilirdi.
“Ukrayna prezidenti Volodimir Zelenski Ukrayna Konstitusiyasının 108-ci maddəsinin birinci hissəsinə uyğun olaraq, Ukraynanın yeni seçilmiş prezidenti vəzifəsini icra etməyə başlayana qədər öz səlahiyyətlərini yerinə yetirməlidir. Ukrayna Ali Radası vurğulayır ki, bu gün Ukraynada beynəlxalq ictimaiyyət tərəfindən tanınacaq beynəlxalq müşahidəçilərin dəvəti ilə azad, şəffaf və demokratik seçkilərin təşkilinin qeyri-mümkün olmasına görə məsuliyyət daşıyan Vladimir Putindir”, - təklif olunan qətnamə layihəsində iddia edilirdi.
Ali Radada “büdrəyən” təşəbbüsdə diqqətə çatırılırdı ki, Rusiyanın genişmiqyaslı işğal kontekstində Ukraynada tətbiq edilən hərbi vəziyyətin ölkə Konstitusiyasına uyğun olaraq seçkilərin keçirilməsinə imkan vermir, eyni zamanda, Ukrayna xalqı belə seçkilərin müharibə başa çatdıqdan sonra keçirilməsi məsələsində həmrəydir.
“Ali Rada Ukrayna xalqı adından bəyan edir ki, Ukrayna demokratik ölkə kimi öz ərazisində hərtərəfli, ədalətli və davamlı sülh təmin olunan kimi, Ukrayna parlamentinin qərarı ilə ölkədə prezident seçkilərinin keçiriləcəyini elan edəcək və seçkilərin bütün beynəlxalq standartlara uyğun keçirilməsini təmin edəcək”, - qətnamə layihəsində vurğulanırdı.
Əslində, Ukraynada prezident seçkilərinin keçirilməsini qeyri-müəyyən vaxta təxirə salınmasını nəzərdə tutan bu qətnamənin Ali Radada zəruri olan dəstəyi almaması arıtq ölkənin siyasi isteblişmentində mərkəzdənqaçma əhval-ruhiyyəsinin gücləndiyindən xəbər verir.
ABŞ Prezidenti Donald Trampın Volodimir Zelenskini “diktator” adlandırması və onu öz vəzifəsindən bərk-bərk yapışmaqda günahlandırması, sözsüz ki, əhəmiyyətli rol oynayıb. Bu baxımdan, artıq Ukraynadakı bəzi siyasi dairələrin və siyasətçilərin artıq Vaşinqtonla pərdəarxası danışıqlar apardığı istisna olunmur.
Ali Radanın keçmiş deputatı, “Başqa Ukrayna” hərəkatının eksperti Spiridon Kilinkarov artıq bəyan edib ki, Zelenskinin səlahiyyətlərinin uzadılmasına dair səsvermə onun parlamentin dəstəyini itirdiyini və tezliklə hakimiyyəti də itirəcəyini göstərir.
Bu arada deputat Aleksey Qonçarenko bildirib ki, Rada Prezident Volodimir Zelenskinin səlahiyyətlərinin uzadılmasına dair qətnamə qəbul etmək üçün yeni cəhd edəcək.
O öz Teleqram kanalında yazıb ki, müvafiq sənədin növbəti iclasda səsverməyə çıxarılması planlaşdırılır: "Demokratiyaya dəstək haqqında qətnamə yenidən Radaya təqdim olunur, növbəti iclasda baxılacaq".
Xatırladaq ki, V.Zelenskinin rəsmi səlahiyyət müddəti 2024-cü il mayın 20-də başa çatıb.
[media=https://www.youtube.com/watch?v=CdhAGkUXROU]
