"Londonda keçirilmiş Ukrayna üzrə Avropa Zirvə Toplantısının iştirakçıları Ukraynaya hərbi yardımı davam etdirəcəklərini və Rusiyaya iqtisadi təzyiqləri artıracaqlarını vəd ediblər".
Senzor.az bildirir ki, bunu Böyük Britaniyanın Baş naziri Kir Starmer sammitdən sonra keçirilən mətbuat konfransında deyib.
"Razılığa gəldik ki, istənilən davamlı sülh Ukraynanın suverenliyinə və təhlükəsizliyinə təminat verməlidir və Ukrayna danışıqlar masası arxasında olmalıdır. Sülh razılaşması olacağı təqdirdə, gələcəkdə istənilən hərbi müdaxilənin qarşısını almaq üçün Ukraynanın müdafiə qabiliyyətini gücləndirməyə davam edəcəyik".
O həmçinin Britaniya və Fransanın Kiyev hakimiyyəti ilə birlikdə döyüş əməliyyatlarını dayandırmaq üçün plan üzərində işləməyə başlayacağını və daha sonra bunu ABŞ-a təqdim edəcəyini bir daha vurğulayıb: "Britaniya Ukrayna ilə yeni iqtisadi saziş imzalayıb, buna əsasən, Kiyev hava hücumundan müdafiə sistemləri üçün raketlər də daxil olmaqla, hərbi satınalmalar üçün 2 milyard dollar məbləğində kredit alacaq". 
Baş nazir vurğulayıb ki, bu addım Ukraynanın danışıqlara daha güclü mövqedən oturmasına kömək edəcək.
O qeyd edib ki, ümumiyyətlə sammitdə razılaşdırılan dörd əsas məsələ aşağıdakılardır:
1. Ukraynaya hərbi yardım davam edəcək – Müharibə bitənə qədər Kiyevə dəstək göstəriləcək, eyni zamanda Rusiyaya qarşı iqtisadi təzyiqlər artırılacaq.
2. Ukraynanın suverenliyi təmin olunmalıdır – Hər hansı sülh razılaşması Kiyevin təhlükəsizliyini və suverenliyini qorumalı, Ukrayna müzakirələrin tamhüquqlu iştirakçısı olmalıdır.
3. Gələcəkdə mümkün işğalların qarşısı alınacaq – Avropa liderləri Rusiyanın Ukraynaya qarşı yeni hücumlarını əngəlləmək üçün tədbirlər görəcək.
4. "Könüllülər koalisiyası" yaradılacaq – Ukraynanın müdafiəsi və sülhün təmin olunması üçün xüsusi beynəlxalq koalisiya formalaşdırılacaq.
Starmer bu məsələlərin həlli üçün Avropa ölkələrinin Ukraynaya real dəstək göstərməli olduqlarını vurğulayıb: "Avropa çətin işi görməlidir. Biz Avropanın bu məsələdə üzərinə düşəni edəcəyini təmin edəcəyik. Amma bu plan ABŞ-ın dəstəyinə ehtiyac duyur".
Baş nazir həmçinin ABŞ-ın etibarsız tərəfdaş olması ilə bağlı fikirləri rədd edərək bildirib ki, Böyük Britaniya və ABŞ dünyada bir-birinə ən yaxın iki ölkədir: "Mən ABŞ-ın etibarsız müttəfiq olduğu fikri ilə razı deyiləm. Biz birlikdə çalışırıq və bu plan ABŞ-la əməkdaşlıq çərçivəsində həyata keçiriləcək. Buna görə də dünən axşam Tramp ilə danışdım".
Böyük Britaniyanın Baş naziri onu da vurğulayıb ki, liderlər yaxın zamanda yenidən görüşmək barədə razılığa gəliblər.
Daha ətraflı bu linkdəki videomaterialda: https://www.youtube.com/watch?v=q4x3Jdcgoe4
**19:34
Böyük Britaniyanın paytaxtı Londonda, şəhərin mərkəzində yerləşən Lankaster-haus iqamətgahında bazar günü günorta saatlarında Ukrayna üzrə Avropa sammiti başlayıb.
Senzor.az xarici KİV-ə istinadən bildirir ki, Birləşmiş Krallığın Baş naziri Kir Starmerin təşkil etdiyi toplantıda 18 ölkə və birliklərin nümayəndələri iştirak edir.
Belə ki, sammitə Almaniya, Danimarka, İspaniya, İtaliya, Kanada, Niderland, Norveç, Polşa, Rumıniya, Finlandiya, Fransa, Çexiya, İsveç liderləri, habelə Avropa Komissiyasının Prezidenti Ursula fon der Lyayen, Avropa Şurasının sədri Antoniu Koşta, NATO-nun Baş katibi Mark Rütte və Ukrayna Prezidenti Volodimir Zelenski qatılıblar. Türkiyəni görüşdə xarici işlər naziri Hakan Fidan təmsil edir. Tədbir iştirakçıları arasında Ukraynanın Londondakı səfiri Valeri Zalujnı da görünüb.
Kir Starmer sammit iştirakçılarına müraciət edərək, bu görüşü Avropanın təhlükəsizliyi üçün nəsillər boyunca bir dəfə baş verə biləcək an kimi qiymətləndirib. O, həmçinin qeyd edib ki, Ukrayna üçün ədalətli sülh əldə edilməsi bütün Avropa ölkələrinin təhlükəsizliyində həyati əhəmiyyət daşıyır.
Elə tədbir ərəfəsində bildirilirdi ki, müzakirələrin əsas mövzusu Ukraynanın mövqeyinin gücləndirilməsi, o cümlədən Kiyevə hərbi təchizat və Rusiyaya iqtisadi təzyiqlərin artırılması olacaq.
