İran Prezidenti Məsud Pezeşkian Urmiya gölünün vəziyyətini qiymətləndirmək və onun bərpası istiqamətində görülən işlərlə tanış olmaq üçün sözügedən ərazidə olub.

Senzor.az yerli KİV-ə istinadən bildirir ki, o, Urmiya gölünün 26 bənddən ibarət fəaliyyət planının iyirmi il əvvəl hazırlandığını, lakin sənədin böyük hissəsinin hələ də icra olunmadığını xatırladıb.

Pezeşkian effektiv həll yollarını müəyyən etmək üçün həm yerli, həm də beynəlxalq ekspertlərlə məsləhətləşmələrin aparılacağını açıqlayıb: “Biz universitet professorlarını, tədqiqatçıları və mütəxəssisləri cəlb etməyə çalışırıq və irəliyə doğru düzgün yollar tapmaqda bizə kömək etmək üçün xarici təcrübədən istifadə etməyi planlaşdırırıq. O cümlədən, təmizlənmiş tullantı sularının yönləndirilməsi, Zərrineh və Simine çaylarından gələn axının idarə olunması ilə bağlı müxtəlif təklifləri nəzərdən keçiririk”, - deyə o vurğulayıb.