Türkiyənin daxili işlər naziri Ali Yerlikaya bir vaxtlar Fətullah Gülənin rəhbərlik etdiyi “Paralel Dövlət” Terror Təşkilatı (FETÖ) ilə əlaqədə şübhəli bilinən 73 nəfərin saxlanıldığını açıqlayıb.
Senzor.az yerli KİV-ə istinadən bildirir ki, əməliyyatlar martın 19-dan 27-dək Türkiyənin 27 əyalətində, həmçinin Ankara, İstanbul və İzmirdə həyata keçirilib.
Nazirin sözlərinə görə, əməliyyatlara həm polis əməkdaşları, həm də jandarm qüvvələri cəlb olunublar. Hüquq-mühafizə orqanlarının hərəkətləri xüsusi xidmət orqanları ilə razılaşdırılıb.
“Saxlanılanlardan 48 nəfər barəsində artıq həbs qətimkan tədbiri seçilib. Onlar terrorçu təşkilatlar ilə əlaqədə olmaqda, cinayətkar təşkilatların ideologiyasını maliyyələşdirmə və təbliğ etməkdə, qadağan olunmuş proqramlardan istifadə etməkdə ittiham olunurlar”, - deyə daxili işlər naziri qeyd edib.
A.Yerlikaya əmin edib ki, FETÖ ilə mübarizə terror təşkilatının təhlükəsi tamamilə aradan qaldırılana qədər davam edəcək.
