Türkiyənin Ticarət Nazirliyinin Narkotiklərlə Mübarizə İdarəsi (NARKOKİM) tərəfindən İstanbul Hava Limanının Yük və Baqaj bölməsində keçirilən əməliyyat zamanı 455,2 kiloqrama yaxın narkotik vasitə (kokain) ələ keçirilib.
Bu barədə Türkiyə KİV-i məlumat yayıb.
Bildirilib ki, qaçaqmalçılar narkotik vasitələrin gizlədildiyi 40 qutudan ibarət bağlamanın İstanbul üzərindən tranzitini planlaşdırırdılar.
Nazirliyin açıqlamasında, gömrük əməkdaşlarının göstərdiyi dəqiq və əzmkar mübarizənin qaçaqmalçılıqla mübarizədə mühüm uğura səbəb olduğu qeyd edilib.
Hadisə ilə bağlı Gaziosmanpaşa Prokurorluğu tərəfindən istintaq aparılır.
Külli miqdarda narkotikin hansı ölkədən hansı ölkəyə göndərildiyi və saxlanılanların olub-olmaması barədə məlumat verilməyib.
