Seçki məntəqələrinin yeni sədrlərinə nəzarət etmək lazımdır. Seçkilər zamanı müşahidəçilərə maneçilik yaradan hal olmamalıdır.
Bunu Mərkəzi Seçki Komissiyasının (MSK) sədri Məzahir Pənahov rəhbərlik etdiyi qurumun bu gün keçirilən iclasında deyib.
Onun sözlərinə görə, işğaldan azad edilmiş ərazilərdəki və Naxçıvandakı seçki məntəqələri xüsusi diqqətdə saxlanılmalıdır:
"Seçki məntəqələrinin təchizatı tam olmalıdır. Məndə olan məlumata görə, Naxçıvandakı seçki məntəqələrində mebel və s. məsələlərlə bağlı qıtlıq var. Naxçıvanın yeni rəhbərliyi ilə də bu barədə müzakirə aparmışam. Oradakı seçki məntəqələri lazımi avadanlıqlarla təmin ediləcək".
**
Seçki məntəqələrində veb-kameraların quraşdırılmasına, işlək hala gətirilməsinə artıq başlanmalıdır.
Bununla bağlı Mərkəzi Seçki Komissiyasının (MSK) sədri Məzahir Pənahov MSK-nın bu gün keçirilən iclasında danışıb.
O qeyd edib ki, prezident seçkilərində veb-kameralarla bağlı heç bir problem olmadı.
"Mən qeyd etdim ki, bizim həmin qrup bu məsələdə yaxşı iş ortaya qoydu. Yenə də həmin məntəqələrə nümayəndələr göndərilməli, onların işləkliyi yoxlanmalıdır".
**
Mərkəzi Seçki Komissiyası (MSK) növbədənkənar parlament seçkilərini izləmək üçün 30-a yaxın təşkilata dəvət göndərəcək.
Bunu MSK sədri Məzahir Pənahov qurumun bu gün keçirilən iclasında deyib.
Onun sözlərinə görə, ötən seçkilərdə müşahidəçilik edən şəxslərə dəvətlər hazırlanıb: "Təxmini 30-a yaxın təşkilata dəvət göndəriləcək".
**
Seçici siyahılarının dəqiqləşməsi ilə bağlı işlər yekunlaşmalıdır.
Bunu Mərkəzi Seçki Komissiyasının (MSK) sədri Məzahir Pənahov qurumun bu gün keçirilən iclasında deyib.
O qeyd edib ki, MSK seçici siyahılarının dəqiqləşdirilməsini mütəmadi aparsa da, seçkiyə 25 gün qalmışa qədər başa çatdırılmalıdır:
"Seçicinin səsvermə hüququnun reallaşdırması mütləqdir. Kiminsə adı obyektiv və ya subyektiv səbəbdən siyahıya düşməyibsə, bütün məntəqələrə müvafiq tapşırıq verilməli, əlavə siyahıya daxil edilməlidirlər. Kiminsə müraciət etməsi, amma səsverməyə imkan yaradılmaması faktı hələ olmayıb".
**16:38
Mərkəzi Seçki Komissiyasının (MSK) bu gün keçirilən iclasında Respublikaçı Alternativ (REAL) Partiyasının, Ağ Partiyanın və Vətəndaş Həmrəyliyi Partiyasının 2024-cü il sentyabrın 1-nə təyin edilmiş Milli Məclisə növbədənkənar seçkilərdə səlahiyyətli nümayəndələrin qeydə alınması ilə bağlı müraciətlərinə baxılıb.
Senzor.az xəbər verir ki, bu barədə MSK katibi Arifə Muxtarova məlumat verib.
Məsələ səsverməyə çıxarılaraq qəbul edilib.
