Prokurorluq Goranboyda bacı və qardaşın qətli ilə bağlı məlumat yayıb.Senzor.az bildirir ki, məlumatda deyilir:
"Fevralın 6-sı saat 17 radələrində rayonun Qarasüleymanlı kəndi ərazisində kənd sakinləri - 1970-ci il təvəllüdlü Pərviz Namazov və bacısı, 1960-cı il təvəllüdlü Səlmi Namazovanın öldürülmələri barədə rayon prokurorluğuna məlumat daxil olub.
Aparılan ilkin araşdırmalarla zərərçəkmişlərin həmkəndlisi, 1965-ci il təvəllüdlü İlham Haqverdiyevin torpaq mübahisəsi ilə əlaqədar aralarında yaranan münaqişə zamanı Pərviz Namazov və Səlmi Namazovaya bıçaqla xəsarətlər yetirərək onları qəsdən öldürməsinə əsaslı şübhələr müəyyən edilib.
İlham Haqverdiyev şübhəli şəxs qismində tutularaq istimtaqa cəlb olunub.
Faktla bağlı Goranboy Rayon Prokurorluğunda Cinayət Məcəlləsinin 120.2.7-ci (iki və ya daha çox şəxsi qəsdən öldürmə) maddəsi ilə cinayət işi başlanılıb.
Hazırda cinayət işi üzrə istintaq tədbirləri davam edir".
**21:20(06.02.2022)
Goranboy rayonunda bacı-qardaşın qətlinin bəzi təfərrüatları məlum olub."Report"un məlumatına görə, Goranboy rayon sakinləri, 1970-ci il təvəllüdlü Pərviz Rəcəb oğlu Namazov və 1960-cı il təvəllüdlü Səlmi Rəcəb qızı Namazova rayonun Qarasüleymanlı kəndində, Goran çayının yaxınlığındakı torpaq sahəsində olan zaman rayon sakini, 1965-ci il təvəllüdlü İlham Haqverdiyevlə mübahisələri yaranıb. Mübahisəyə səbəb elə hadisənin törədildiyi yerdəki torpaq sahəsi olub.
İ.Haqverdiyev torpağın məhkəmə qərarı ilə ona məxsus olduğunu iddia edərək avtomobilindəki bıçağı götürərək bacı-qardaşı boyun və digər nahiyələrdən bıçaqlayıb. Hər iki şəxs aldığı ağır xəsarətlərdən hadisə yerindəcə dünyasını dəyişib.
Qətli törətməkdə şübhəli bilinən İ.Haqverdiyev polis əməkdaşları tərəfindən saxlanılıb.
Faktla bağlı Goranboy rayon Prokurorluğunda cinayət işi başlanıb, araşdırmalar davam etdirilir.
**19:36
Goranboyda qətl hadisəsi baş verib.
APA-nın xəbərinə görə, hadisə rayonun Qarasüleymanlı kəndində qeydə alınıb.
Kənd sakinləri - 1960-cı il təvəllüdlü Namazova Səlmi Rəcəb qızı və qardaşı, 1970-ci il təvəllüdlü Namazov Pərviz Rəcəb oğlu bıçaqlanaraq öldürülüblər.
Hadisəni törədən isə onların həmkəndliləri, 1965-ci il təvəllüdlü Haqverdiyev İlham Şahverdi oğludur.
Hadisənin torpaq sahəsi üstündə baş verdiyi deyilir.
İ. Haqverdiyev polis tərəfindən saxlanılıb.
