“Qarabağ” UEFA Çempionlar Liqasının əsas mərhələsində Bakıda Danimarkanın “Kopenhagen” komandasına qarşı keçiriləcək II tur oyunundan öncə azarkeşlərinə müraciət edib.
Senzor.az Kluba istinadən bildirir ki, Tofiq Bəhramov adına Respublika Stadionunda oynanılacaq matçı izləmək üçün fanatların arenaya erkən gəlməsi ilə bağlı çağırış edilib.
Bildirilib ki, bu, onların stadiona rahat daxil olmağına, sıxlıqdan yayınmağına və komandanın isinmə hərəkətlərini tam dolu tribunalar qarşısında həyata keçirərək əlavə motivasiya qazanmağına imkan verəcək.
Həmçinin stadionun qapılarının qarşılaşmaya 2 saat qalmış açılacağı, oyun başlayandan 20 dəqiqə sonra arenaya girişin məhdudlaşdırılacağı vurğulanıb.
Qeyd edək ki, "Qarabağ" - "Kopenhagen" oyunu oktyabrın 1-də, saat 20:45-də Tofiq Bəhramov adına Respublika stadionunda start götürəcək.
