Gürcüstanda məhkumluq həyatı yaşayan sabiq Prezident Mixail Saakaşvili ölkə rəhbərliyinə müraciət edərək müalicə üçün Kiyevə göndərilməsini təklif edib.“Qafqazinfo” xəbər verir ki, bu barədə gürcü siyasətçi Tbilisidə növbəti məhkəmə prosesində deyib.
Saakaşvili müalicədən sonra Tbilisiyə qayıtmağı və həbs cəzasını çəkməyə davam etməyi vəd edib.
“Bilirsiniz ki, həbsxanada aldığım travmalar nəticəsində məndə ciddi nevroloji vəziyyət yaranıb. Bu, dərhal müalicə tələb edir. Sizi Ukrayna XİN-in təklifi ilə razılaşmağa və mənim Ukraynaya müalicə üçün transfer olunmağıma razılaşmağa çağırıram”, - deyə Saakaşvili bildirib.
Onun sözlərinə görə, Kiyevdə vəziyyəti stabilləşdikdə Gürcüstana qayıdacaq. Həmçinin transferi Avropa ölkələrindən biri həyata keçirə bilər.
“Bu təklifimlə razılaşsanız, bütün tərəfdarlarımı etiraz aksiyalarını dayandırmağa çağıracam”, - deyə gürcü siyasətçi əlavə edib.
