“Uzun illər ən soyuq aylardan biri hesab olunan fevral ayı bu il mülayim keçərək, xüsusən də son həftəsində, yaz havası ilə fərqlənib”.Senzor.az bildirir ki, bunu jurnalistlərə açıqlamasında Ekologiya və Təbii Sərvətlər Nazirliyi Milli Hidrometeorologiya Xidmətinin rəisi Umayra Tağıyeva deyib.
Onun sözlərinə görə, fevralın 1-dən 28-dək havanın orta sutkalıq temperaturu 8,2 dərəcə isti olub ki, bu da iqlim normasından 4 dərəcə yüksəkdir: “Belə göstəricilərlə, bu ilin fevral ayı son 70 ildə ən isti fevral ayı olub”.
Xidmət rəisi qeyd edib ki, ay ərzində ən yüksək temperatur fevralın 9-da olub-19 dərəcə isti. Bu da iqlim normasından 9 dərəcə yüksəkdir. Ən minimal temperatur isə fevralın 6-da qeydə alınıb -1,7 dərəcə.
Fevralın 13-də Bakıda şimal-qərb küləyinin maksimal sürəti 25 m/s -ə çatıb: “Ötən illərlə müqayisədə bu il fevralda yağıntı xeyli az düşüb. Düşən yağıntının miqdarı Bakıda və Abşeron yarımadasında 3 mm (aylıq normanın 14 faizi), Qazax-Gəncə zonasında 1-5 mm (aylıq normanın 2-22 faizi), Qarabağ zonasında 12-16 mm (aylıq normanın 40-45 faizi), Balakən-Şəki zonasında 3-22 mm (aylıq normanın 8-73 faizi), Mərkəzi Aran zonasında 2-13 mm (aylıq normanın 6-62 faizi), Lənkəran-Astara zonasında 40-51 mm (aylıq normanın 39-84 faizi) qeydə alınıb”.
U.Tağıyevanın sözlərinə görə, mart ayının ilk günlərində iqlim normasından yüksək temperatur rejimi davam edəcək, birinci ongünlüyün ikinci yarısı isə hava qeyri-sabit keçəcək.
