Rusiya Ukraynada müharibə başlayandan bu günə kimi olan itkilərinin sayını açıqlayıb. Senzor.az -ın məlumatına görə, Rusiya Müdafiə Nazirliyinin rəsmi nümayəndəsi general-mayor İqor Konaşenkov müharibə statistikalarını açıqlayarkən ölkə qoşunlarının xüsusi əməliyyat başlayandan 498 nəfər itki verdiyini bildirib.
“Təəssüf ki, xüsusi hərbi əməliyyatda iştirak edən yoldaşlarımız arasında itkilər var. 498 rusiyalı hərbçi xidməti borcunu yerinə yetirərkən həlak olub. Həlak olanların ailələrinə hər cür köməklik göstərilir. 1597 əsgər yoldaşımız isə yaralanıb”, - deyə Konaşenkov bildirib.
İ.Konaşenkov qarşı tərəfin itkiləri barədə də məlumat verib. Onun sözlərinə görə, Ukraynanın millətçiləri və hüquq-mühafizə orqanlarının hərbçiləri arasında 2870-dən çox ölü və 3700-ə yaxın yaralı var: "Təkcə təsdiqlənmiş məlumatlara görə, Ukrayna hüquq-mühafizə orqanlarından əsir götürülən hərbçilərin sayı 572 nəfərdir".
