Qazaxıstan Prezidenti Kasım-Jomart Tokayev Gürcüstanın Baş naziri İrakli Kobaxidzeni I dərəcəli "Dostık" ordeni ilə təltif edib.

Senzor.az "Akorda"ya istinadən bildirir ki, təltifetmə mərasimi Gürcüstan hökumət başçısının rəsmi səfəri çərçivəsində Astanada keçirilib.

Mərasimdə çıxış edən Tokayev Kobaxidzeni Qazaxıstanın dostu, uzaqgörən lider və öz işinə sadiq dövlət xadimi adlandırıb. O qeyd edib ki, baş nazirin rəhbərliyi altında Gürcüstan genişmiqyaslı sosial-iqtisadi islahatlar həyata keçirir, beynəlxalq nüfuzunu möhkəmləndirir və əsas regional tərəfdaş kimi mövqelərini gücləndirir.

Qazaxıstan Prezidenti, həmçinin iki ölkə arasında münasibətlərin yüksək səviyyədə olduğunu vurğulayıb. Onun sözlərinə görə, Qazaxıstan və Gürcüstanı dərin tarixi köklər, ortaq mədəni dəyərlər, çoxəsrlik dostluq və qarşılıqlı anlaşma bağlayır.

Tokayev qeyd edib ki, son illərdə ikitərəfli münasibətlər yeni təkan alıb: "Siyasi dialoq fəallaşıb, qarşılıqlı ticarət artır, iqtisadi əməkdaşlıq isə müxtəlif sahələrdə genişlənir".

Liderliyin və Qazaxıstanla Gürcüstan arasında əməkdaşlığın möhkəmləndirilməsinə verilən mühüm töhfənin etirafı olaraq, Tokayev Kobaxidzeyə I dərəcəli "Dostık" ordenini təqdim edib.

Gürcüstanın Baş naziri isə onun fəaliyyətinə verilən yüksək qiymətə görə Qazaxıstan Prezidentinə təşəkkür edib.

Daha əvvəl danışıqların yekununda tərəflər Qazaxıstan və Gürcüstan arasında strateji tərəfdaşlıq haqqında bəyanat imzalayıblar.