Cinayət Məcəlləsinin 145.2.1 və 145.2.4-cü (qabaqcadan əlbir olan bir qrup şəxs tərəfindən iki və daha çox şəxsi qanunsuz azadlıqdan məhrum etmə) maddələri ilə təqsirləndirilən "Qurtuluş" Reabilitasiya Mərkəzinin rəhbəri Ceyhun Salmanov və mərkəzin əməkdaşları Elşad Məhərrəmovla Natiq Əliyevin cinayət işi üzrə məhkəmə prosesi yekunlaşıb.
Senzor.az bildirir ki, Sumqayıt Şəhər Məhkəməsində hakim Fərid Nəsimiyevin sədrliyi ilə keçirilən prosesdə prokuror Emil Murquzov Ceyhun Salmanov və Elşad Məhərrəmova 4 il, Natiq Əliyevə isə 3 il 6 ay müddətinə azadlıqdan məhrum edilmə cəzası istəyib.
Məhkəmənin hökmünə əsasən, Ceyhun Salmanov 3 il 3 ay, Elşad Məhərrəmov 3 il 6 ay, Natiq Əliyev isə 3 il müddətinə azadlıqdan məhrum ediliblər.
Onlara Cinayət Məcəlləsinin 70-ci maddəsi tətbiq edilməklə 2 il sınaq müddəti təyin edilib və hər üçü məhkəmə zalından azadlığa buraxılıb.
