Yekaterinburqda iş adamlarının qətli ilə bağlı 24 il həbs cəzasına məhkum edilmiş Uraldakı Azərbaycan diasporunun keçmiş lideri Şahin Şıxlinski, Bakıda həbsdə olan Rusiya vətəndaşlarının iştirakı ilə mümkün məhbus mübadiləsinə daxil edilə bilər.

"Unikal" xəbər verir ki, bu barədə E1 mənbələrə istinadən məlumat yayıb. 

Nəşrin məlumatına görə, mübadilə avqustun əvvəlində baş tuta bilər. Mənbələrə görə, Şıxlinskinin oğlu da prosesə daxil ediləcək.

E1-in mənbələrindən biri bildirib ki, diasporun keçmiş rəhbəri mübadilədə iştirakına "100% əmindir" və nikbindir.

Xatırladaq ki, daha əvvəl Rusiya xarici işlər nazirinin müavini Mixail Qaluzin Moskvanın bu məsələni Azərbaycan xarici işlər naziri Ceyhun Bayramovla müzakirə etməyi planlaşdırdığını bildirmişdi.