Birləşmiş Ərəb Əmirliklərinin (BƏƏ) İrana dondurulmuş aktivlərdən bir neçə milyard dollar və 283 milyon dollar dəyərində 2 ton qızıl göndərdiyi iddia olunur.

“Reuters” xəbər verir ki, qiymətli yük avqustun 11-i və 12-də Əbu-Dabidən “Boeing” təyyarəsi ilə Tehranın Mehrabad və Payam hava limanlarına çatdırılıb.

İddialara əsasən, bu addım BƏƏ-nin İran tərəfindən mümkün hücumların qarşısını almaq və öz təhlükəsizliyini təmin etmək məqsədi daşıyıb.

Maraqlı detal isə yükü daşıdığı bildirilən təyyarənin bundan əvvəl də Tehrana uçmasıdır. Həmin təyyarə iyunun 8-də Mehrabad hava limanına enib. “Reuters”in iranlı rəsmilər arasındakı mənbələrinə görə, həmin reys zamanı təyyarədə 3 milyard dollar olub.

Beləliklə, BƏƏ-nin İrana böyük həcmdə maliyyə və qiymətli metal göndərməsi ilə bağlı məlumatlar regionda gərginliyin fonunda diqqət çəkib.

Lakin aktivlərin hansı şərtlərlə və hansı qərar əsasında İrana qaytarıldığı açıqlanmayıb.(Modern.az)