Ukraynanın müdafiə naziri Oleksiy Reznikov Belarus xalqına müraciət edib.APA-nın xəbərinə görə, müraciət Ukrayna müdafiə nazirinin “Facebook” səhifəsində yayımlanıb.
Ukraynalı nazir bildirib ki, təsdiqlənmiş məlumatlara əsasən, Rusiya silahlı qüvvələrinin komandanlığı bəzi təxribatlar hazırlayır. Rusiya aviasiyası Belarus Respublikası ərazisində Ukrayna-Belarus sərhədi yaxınlığında yerləşən bir neçə yaşayış məntəqəsinə zərbə endirməyə hazırlaşır. Onlar xüsusilə Kopanı qəsəbəsini (Brest vilayətinin Stolın rayonu) vurmağı planlaşdırırlar. Rusiya Belarusa Ukrayna hava məkanından zərbə endirmək niyyətindədir. Məqsəd Belarusun hazırkı rəhbərliyini Ukraynaya qarşı müharibəyə məcbur etməkdir.
"Mən zəmanət verirəm ki, Ukrayna ordusu Belarusa qarşı heç bir təcavüzkar hərəkət planlaşdırmayıb, planlaşdırmır və planlaşdırmayacaq. 15 günlük müharibədə Ukrayna silahlı qüvvələri 12 mindən çox rus əsgərini öldürüb. Ölkənizin bu müharibəyə sürüklənməsinə imkan verməyin! Yaxınlarınızın həyatını xilas edin! Kremlin Belarusun gələcəyini məhv etməsinə imkan verməyin", - deyə nazir müraciətində vurğulayıb.
Ukraynanın Strateji Kommunikasiya və İnformasiya Təhlükəsizliyi Mərkəzi isə bildirib ki, bu addım artıq Moskva və Minsk arasında razılaşdırılıb...
Qeyd edək ki, Ukrayna Müdafiə Nazirliyi Belarus-Ukrayna sərhəddində iki hərbi təyyarənin Ukrayna hava məkanından Belarus ərazisinə hava zərbələri endirməsi ilə bağlı görüntü yayıb.
