Şimali Kipr sahillərində 267 nəfərin olduğu “Filo Jet” sərnişin gəmisinin batması ilə bağlı istintaqda yeni mərhələ başlayıb.
Senzor.az yerli KİV-ə istinadən bildirir ki, qəza ilə bağlı saxlanılan 9 nəfər Girnə Qəza Məhkəməsinə çıxarılıb.
Məhkəmə qarşısına gəminin kapitanı, 7 ekipaj üzvü və daşıyıcı şirkətin bir əməkdaşı çıxarılıb. İstintaq çərçivəsində saxlanılan şəxslərin ifadələrinin alınması və hadisənin texniki tərəflərinin araşdırılması gözlənilir.
Türkiyə mediasında yayılan məlumatlarda “Filo Jet”in ekipajında Azərbaycan vətəndaşlarının da olduğu deyilir. Onların Valeh Hümmətov və Rəşad İbrahimov olduğu bildirilir.
Xatırladaq ki, gəmidə 259 sərnişin və 8 ekipaj üzvü olmaqla 267 nəfər olub. Gəmi limandan ayrıldıqdan qısa müddət sonra ön hissəsindən su almağa başlayıb və daha sonra alabora olaraq 514 metr dərinliyə batıb. Hadisə zamanı 8 nəfərin öldüyü, 18 nəfərini isə itkin düşdüyü bildirilir.
