ABŞ-da səfərdə olan Ukrayna Prezidenti Vladimir Zelenski Pentaqon rəhbəri Lloyd Ostinlə görüşüb. Tərəflər Donbasdakı vəziyyəti, Rusiyanın Azov-Qara dəniz bölgəsindəki aqressiyasına qarşı mübarizə üçün əməkdaşlığın inkişaf perspektivlərini müzakirə ediblər.
Senzor.az yerli KİV-ə istinadən bildirir ki, məlumatı Ukrayna liderinin mətbuat xidməti yayıb.
Zelenski avqustun 26-da Kabildə törədilən terror aktında həlak olmuş ABŞ hərbçilərinə görə başsağlığı verib, Ukraynanın Əfqanıstandan təxliyədə göstərdiyi köməyi qeyd edib.
Pentaqon rəhbəri ABŞ-ın Ukraynanın yanında olacağını, suverenliyini və ərazi bütövlüyünü dəstəkləyəcəyini, Rusiyanın təcavüzünə qarşı kömək edəcəyinəi və Kiyevin NATO hədəflərini dəstəkləyəcəyini bildirib.
Görüşdə Zelenski köməyə görə təşəkkür edib, ABŞ-dan Ukrayna ordusu üçün müalicə- reabilitasiya mərkəzləri şəbəkəsinin inkişafına dəstək gözlədiyini söyləyib.
Xatırladaq ki, Zelenski ABŞ-da işgüzar səfərdədir, onun bu gün Prezident Co Baydenlə görüşü planlaşdırılır.
Yeri gəlmişkən, bundan əvvəl V.Zelenski bir çox məsələdə məhz Baydenin fikirlərini eşitmək istədiyini bildirmişdi: “Bizim sadəcə sual-cavabdan ibarət yox, ciddi görüşümüz var. Bir çox məsələ var ki, cavab yox, fikir almaq lazımdır. Bir çox məsələdə Baydenin fikirlərini eşitmək istəyirəm”.
