“G7” ölkələri Rusiyaya qazın pulunu rublla ödəməyəcəklər”. "Associated Press" xəbər verir ki, bu barədə Almaniyanın vitse-kansleri Robert Xabek deyib.
O bildirib ki, "G7" ölkələri Rusiyanın enerji idxalına görə rublla ödəniş tələbindən imtina edirlər.
Vitse-kansler əlavə edib ki, Almaniya Rusiyadan təbii qaz idxalının dayandırılmasının bütün ssenarilərinə, o cümlədən Moskvanın birtərəfli qaydada tədarükü kəsməsi variantına hazırdır.
"Biz bütün ssenarilərinə hazırıq, özü də təkcə dünəndən yox. Almaniya hökuməti yeni ilin əvvəlindən bunun üzərində işləyir. Berlin Rusiyadan neft, qaz və kömür idxalı asılılığını tədricən azaltmağa səy göstərir", - o vurğulayıb.
Vitse-kansler Moskvanın qazın pulunu rublla ödəməsi tələbini Qərbi parçalamaq cəhdi kimi qiymətləndirib. O, qaz tədarükünün rublla ödənilməsinin qəbuledilməz olduğunu söyləyib.
Azvision.az xatırladır ki, bundan əvvəl Rusiya Prezidenti Vladimir Putin hökumətin iclasında bildirib ki, təbii qaz tədarükü üçün ödənişlər dollar, avro da daxil olmaqla digər valyutalarla qəbul edilməyəcək, rublla ödənişlərə keçiləcək.
“Mən qeyri-dost adlandırılan ölkələrə verilən təbii qaz üçün ödənişlərin Rusiya rublu ilə edilməsinə dair bir sıra tədbirləri həyata keçirmək qərarına gəldim”, - Putin qeyd edib.
"G7" dövlətlər qrupuna Böyük Britaniya, Almaniya, İtaliya, Kanada, ABŞ, Fransa, Yaponiya daxildir.
