Rusiya Prezidenti Vladimir Putin özünü imperator I Pyotrla müqayisə edib.
TASS xəbər verir ki, Rusiya Prezidenti müqayisəni gənc sahibkarlarla görüşündə aparıb.
"I Pyotrun 350 illiyinə həsr olunmuş sərgidə idik. Demək olar ki, heç nə dəyişməyib. I Pyotr 21 il Şimal müharibəsində vuruşub. Deyəsən, İsveçlə döyüşüb. Əvvəl uğursuz olsa da, sonradan qayıdıb gücləndi. Görünür, bizim də qismətimizə düşüb ki, qayıdaq və güclənək”.
V.Putin onu da xüsusi qeyd edib ki, müasir dünyada dövlətlər ya suveren, ya da müstəmləkədirlər, aralıq dövlət yoxdur: “Dünya sürətlə dəyişir. Və bir növ liderliyə iddialı olmaq üçün hər hansı bir ölkə, xalq, etnik qrup öz suverenliyini təmin etməlidir”.
Onun sözlərinə görə, müstəmləkələrin sərt geosiyasi mübarizədə sağ qalmaq şansı yoxdur: “Əgər bir ölkə və ya bir qrup ölkə suveren qərarlar qəbul edə bilmirsə, o, artıq müəyyən dərəcədə müstəmləkədir və müstəmləkənin belə sərt geosiyasi mübarizə şəraitində yaşamaq üçün tarixi perspektivi, şansı yoxdur”.
