"Ola bilsin ki, bu mənim sonuncu döyüşüm olmasın".

Senzor.az bildirir ki, bunu Bakıda vida döyüş gecəsi keçirəcək Azərbaycan kikboksçusu Zabit Səmədov deyib.

O bildirib ki, braziliyalı rəqibinə uduzsa, revanş döyüşü istəyəcək: "Əgər Antonio Silvaya uduzsam, mütləq revanş olacaq. Karyeramı qələbə ilə başa vurmaq istəyirəm".

Z.Səmədovun sözlərinə görə, kikboksçu Alim Nəbiyevi də bu turnirə o dəvət edib: "Bildiyiniz kimi, mən Belarusda, o da Ukraynada yaşayıb. İstədim ki, doğma vətəndə – Azərbaycanda turnirdə çıxış etsin. Mənim sahibi olduğum klubda məşq keçdi və dəvətimi yerə salmayıb turnirə qatılmağa razılıq verdi. Alim "Glory" turnirində çıxış edir. Kifayət qədər tanınmış idmançıdır. Belə bir döyüşçünün burada olması böyük üstünlükdür".

Qeyd edək ki, sentyabrın 10-da keçiriləcək bu yarış Milli Gimnastika Arenasında baş tutacaq. Döyüşlər hər biri 3 dəqiqədən ibarət olmaqla 3 raund üzrə keçiriləcək.

Mix Fight Championship liqası çərçivəsində keçirilən görüşləri Caspian International Broadcasting Company – CBC TV-də Bakı vaxtı ilə saat 21:00-dan etibarən canlı yayımda izləmək mümkün olacaq.