İrəvanda yüzlərlə vətəndaş Ermənistanın baş naziri Nikol Paşinyanın istefası tələbi ilə parlament binası yaxınlığında etiraz aksiyasını bərpa edib.

Senzor.az yerli KİV-ə istinadən bildirir ki, aksiyada İkinci Qarabağ müharibəsində həlak olan hərbçilərin yaxınları da iştirak edirlər.

Aksiya zamanı maraqlı hadisə baş verib. Etirazçıların bir hissəsi parlament binası yaxınlığında toplaşanlardan ayrılaraq ikinci prezident Robert Köçəryanın ofisinə gəlib. Keçmiş dövlət başçısının ofisi nümayişçilərin yolunun üstündəki Respublika meydanının yanında yerləşir. Onlar Köçəryanı müxalifət hərəkatına rəhbərlik etməyə və məsuliyyəti öz üzərinə götürməyə çağırıblar.

Ermənistanın ikinci prezidentinin ofisinə gələnləin qarşısına onun oğlu Levon Köçəryan çıxıb. O bildirib ki, Robert Köçəryanın vətəndaşlarla görüşünün harada və hansı formatda keçiriləcəyi barədə sabah səhər məlumat veriləcək.

Senzor.az