“18 sentyabr 2022-ci il tarixində Ermənistana səfəri çərçivəsində ABŞ Nümayəndələr Palatasının spikeri Nensi Pelosi tərəfindən verilmiş və bölgədəki vəziyyəti təhrif edən açıqlama ciddi təəssüf doğurur. N.Pelosi tərəfindən Azərbaycana qarşı irəli sürülən əsassız və ədalətsiz ittihamlar qəbuledilməzdir”.
Senzor.az bildirir ki, Azərbaycan Respublikası Xarici İşlər Nazirliyinin bəyanatında belə deyilir.
Qeyd olunur ki, bu ilin 12 sentyabr tarixindən 13 sentyabra keçən gecə delimitasiya olunmamış şərti sərhəddə baş verən insident Ermənistanın Azərbaycana qarşı törətdiyi genişmiqyaslı hərbi təxribat idi və Azərbaycan Silahlı Qüvvələri tərəfindən bu təxribatın qarşısı alınıb və ölkənin suverenliyi və ərazi bütövlüyünün qorunması təmin edilib: “Hal-hazırda atəşkəs rejimi təmin olunur və vəziyyətin gərginləşməsinin qarşısı alınıb. Bölgədə vəziyyətin bu şəkildə gərginləşdirilməsi və genişmiqyaslı təxribatın törədilməsinə görə bütün məsuliyyət Ermənistanın hərbi-siyasi rəhbərliyinin üzərinə düşür. 
Ümumiyyətlə, N.Pelosi ermənipərəst siyasətçi kimi tanınır və onun nümayəndə heyətinin tərkibində Konqresin məhz ermənipərəst üzvlərinin olması bunu bilavasitə nümayiş etdirir. Qarşıdan ABŞ-da Konqresə ortamüddətli seçkilər dövrü gəldiyini nəzərə alaraq, görünür N.Pelosi də bu səfərdən öz daxili siyasi gündəliyi və ABŞ-dakı erməni lobbi dairələrinin dəstəyini qazanmaq üçün istifadə edir”.
Bildirilir ki, ABŞ-ın daxili siyasi gündəliyində olan siyasi intriqalar və lobbi maraqlarının Ermənistan üzərindən Cənubi Qafqaz regionuna daşınması qəbuledilməzdir: “Təəssüflə vurğulayırıq ki, ədalətdən danışan N. Pelosi Azərbaycana qarşı Ermənistanın təcavüz siyasəti, ərazilərinin 30 ilə yaxın davam edən işğalı, yüz minlərlə azərbaycanlının etnik təmizlənməsi və Ermənistanın məsuliyyət daşıdığı digər bu kimi ağır cinayətlərlə bağlı bugünədək məqsədli şəkildə heç bir mövqe nümayiş etdirməyib.
N.Pelosinin Ermənistanda söylədikləri erməni təbliğatı əsasında verilmiş açıqlama kimi dəyərləndirilməlidir. Bu, Ermənistanla Azərbaycan arasında hal-hazırda münasibətlərin normallaşması istiqamətində atılan səylərə ciddi zərbədir. Bu kimi birtərfli addımlar və verilən əsassız açıqlamalar regionda kövrək sülhün gücləndirilməsinə deyil, əksinə gərginliyin artmasına xidmət edir”. 
Xatırladaq ki, ABŞ Konqresi Nümayəndələr Palatasının sədri Nensi Pelosi İrəvanda Ermənistan Parlamentinin sədri Alen Simonyanla birgə keçirdiyi mətbuat konfransında deyib: “Ermənistanın müstəqilliyinə və suverenliyinə qarşı hücum olub. ABŞ Konqresi adından Azərbaycanın Ermənistan ərazisinə etdiyi qanlı hücumları qətiyyətlə pisləyirik”.
O bildirib ki, ABŞ hücumun Azərbaycandan tərəfdən olduğunu təsdiqləyib. Konqres artıq Azərbaycanın təcavüzünü pisləyən qətnamə hazırlayıb. “Biz Ermənistana kömək etməyə və onun sərhədlərinin dəyişdirilməsinə qarşı çıxmağa davam edəcəyik. Qərarı Ermənistan verir, əgər Ermənistan istəyərsə, biz kömək etməyə hazırıq ”,- Pelosi bildirib.
Onun sözlərinə görə, ABŞ-ın Ermənistan üçün nələr edə, müdafiə sahəsində əməkdaşlığı necə qura biləcəyini öyrənmək üçün İrəvana gəlib.
“Azərbaycanın Dağlıq Qarabağın mülki əhalisinə qarşı hərəkətləri, tarixi abidələrə qarşı vandalizmi diqqət mərkəzindədir. ABŞ ATƏT-in Minsk Qrupunun həmsədri kimi Qarabağ münaqişəsinin hərbi yolla həllinin olmadığını təkid etməyə davam edir, biz münaqişənin sülh yolu ilə, siyasi və davamlı həllində israrlıyıq”,- o vurğulayıb.
Senzor.az
