“Vaşinqtonda keçiriləcək üçtərəfli görüşlə bağlı gündəliyimizdə müxtəlif mövzular var”.
Bunu xarici işlər naziri Ceyhun Bayramov jurnalistlərə açıqlamasında deyib.
Nazir bildirib ki, görüşdə sülh müqaviləsinin əsas elementləri ilə bağlı müzakirələrin aparılması gözlənilir:
“Bildiyiniz kimi, oktyabrda Cenevrədə görüşümüz oldu. Bu görüşdə daha əvvəl təqdim olunmuş 5 prinsip üzərində genişlənmiş elementləri qarşı tərəfə təqdim etmişdik. Qarşı tərəfin buna reaksiyası istənilmişdi və onlar bildirmişdi ki, bunun üçün əlavə vaxt lazımdır. Bu, təkliflərin öyrənilməsi və geri dönüş üçün təbiidir. Düşünürəm ki, bu görüş zamanı bizim bu məsələləri müzakirə etmək imkanımız olacaq”, - XİN rəhbəri əlavə edib.
Qeyd edək ki, yaxın zamanlarda Vaşinqtonda ABŞ Dövlət katibi Entoni Blinkenin iştirakı ilə Azərbaycan və Ermənistan XİN rəhbərlərinin görüşü gözlənilir.
