İrandakı əfqan komandolar Ukraynada Rusiya hərbçiləri tərəfindən döyüşlərdə iştirak etmək üçün cəlb olunur.
Bu barədə “Business Insider”in yaydığı məqalədə bildirilib.
Məlumata görə, komandolar vatsap və ya siqnal vasitəsilə əlaqə saxladıqlarını təsdiqləyiblər. Qısa ismarışlar vasitəsilə onlara aylıq 1500 dollar maaş, əsgər ailələri üçün Rusiyada yaşamaq icazəsi, hətta, pasportlar təklif edilir. Yüksək rütbəli zabitlərə 2500 dollar maaş vəd olunub.
Mənbə vurğulayıb ki, Əfqanıstan Xüsusi Əməliyyat Qüvvələrinin ABŞ-da təlim keçmiş təxminən 22 000 üzvünün taleyi sual doğurur. Bu komandolar ABŞ ordusunun Əfqanıstanda iştirakının son illərində “Taliban”və başqa qiyamçılara qarşı döyüşün aparıcısı olub. Əfqanıstan hökumətinin qəfil dağılmasından və 2021-ci ilin avqustunda “Taliban” tərəfindən Kabilin ələ keçirilməsindən dərhal sonra Əfqanıstan ordusu parçalanıb: “Bu, komandolardan da yan ötməyib”.
“Taliban”dan sonra yalnız 1000-ə yaxın əfqan komandosu ABŞ-a təxliyə edilib, bir neçə nəfər isə Avropa və Türkiyəyə gedib. Təxminən 20 min nəfər qalıb. Yeni hakimiyyət amnistiya elan etsə də, xüsusi əməliyyat qüvvələrinin çox onu qəbul etməyib.
Bildirilib ki, buna görə də keçmiş əfqan komandoları və onların ailələri qonşu ölkələrə sığınıblar. Onların bir neçə yüzü Pakistana, bir neçə nəfər isə Tacikistana gedib. Ancaq onların çoxu, 2000-5000 arası İrana qaçıb. Onların, əsasən, Tehran və Məşhəddə cəmləşdikləri qeyd olunub. 14 000 keçmiş komando Milli Müqavimət Cəbhəsi adı altında müxtəlif müxalifət qruplarının sıralarında döyüşür.
Bu arada, işəgötürənlər, deyəsən, Əfqanıstanda keçmiş komandoları işə götürməyə çalışırlar. İranlılardan biri deyir ki, ondan hələ də Əfqanıstanda olan keçmiş komandoların əlaqə məlumatlarını paylaşması xahiş olunub. Onlarla əlaqə saxlayan işəgötürənlər özlərini təqdim etməsələr də, demək olar ki, İran rəsmiləri tərəfindən ötürülən məlumatlardan istifadə edir, komandolar üçün telefon nömrələri və İrana daxil olarkən əvvəlki təcrübələrinin təfərrüatlarını toplayırlar.
Məqalədə vurğulanıb ki, İran hakimiyyəti Tehran və Məşhəddə əfqanların Ukraynada könüllü döyüşməsi üçün işə qəbul mərkəzləri açıb. Bu ofislər haqqında məlumatlar ağızdan-ağıza yayılır.
İranda müsahibə götürülən 4 keçmiş xüsusi təyinatlı bildirib ki, komandoların azı üçdə biri, yaxud bir neçə yüzdən 1500-ə qədəri Ukraynada döyüşmək təklifini artıq qəbul edib.
Məşhəddəki komandolardan biri 200-ə yaxın keçmiş xüsusi təyinatlı döyüşçü və onların ailələrinin Ukraynaya göndərilmək üçün artıq Rusiyaya getdiklərini iddia edib.
İranın Əfqanıstandakı konsulluğunun da Ukraynada döyüşmək istəyən könüllülərin ölkəni tərk etmələrinə yardım göstərdiyi bildirilir.(“Report”)
