Rusiya ilə Azərbaycan arasında ikitərəfli münasibətlər artan xətt üzrə inkişaf edir.
Yerli KİV xəbər verir ki, bunu azərbaycanlı jurnalistlərə açıqlamasında Rusiya prezidentliyinə namizəd, Liberal Demokrat Partiyasının sədri Leonid Slutski bildirib.
“Azərbaycanda məni görən və eşidən hər kəsi salamlayıram. Mən uzun müddətdir ki, ruhumda, ürəyimdə Azərbaycanla yaşayıram. Dostum və qardaşım, Azərbaycan Prezidenti İlham Heydər oğlu Əliyevi hazırda Azərbaycanın iqtisadiyyatında, o cümlədən Qarabağ Vətənə qayıtdıqdan sonra əldə edilən uğurlar münasibətilə təbrik etmək istəyirəm. Şuşa və bütün digər yaşayış məntəqələri evinə qayıdıb. Müasir Azərbaycanın qurucusu dahi Heydər Əliyevin vəsiyyət etdikləri bu gün yerinə yetirilib”, - deyə Slutski vurğulayıb.
RF prezidentliyinə namizəd qeyd edib ki, azad olunan torpaqlara insanların qayıdışı üçün hələ görüləsi çox iş var. “Mən əminəm ki, tezliklə sülh müqaviləsi imzalanacaq".
Slutksi Rusiya ilə Azərbaycan arasında əlaqələrin səviyyəsindən danışarkən bir çox mühüm iqtisadi layihələrin, xüsusən də Rusiya Baş naziri Mixail Mişustinin Bakıya səfərindən sonra həyata keçiriləcək və inkişaf etdiriləcəyinə əmin olduğunu söyləyib: “Azərbaycan bu gün postsovet məkanında ən çiçəklənən ölkələrdən və iqtisadiyyatlardan biridir. Azərbaycana uğurlar arzulayıram. Əminəm ki, bunda sonra da ölkələrimiz arasında ikitərəfli münasibətlər daha sürətlə və səmərəli şəkildə inkişaf edəcək”.
Rusiya prezidentliyinə namizəd səsvermə zamanı Azərbaycan Milli Məclisin iki deputatının onu öz seçki məntəqəsində müşahidə etdiyini də xatırladıb. Əlavə edib ki, Dövlət Duması ilə Milli Məclis arasında əməkdaşlıq inamla inkişaf edir.
