Ermənistandakı etirazçıların lideri Baqrat Qalstanyan İrəvanda Respublika meydanında çıxış edərkən jurnalistlərə bildirib ki, Ermənistanın baş naziri Nikol Paşinyana həbsxanada baş çəkməyə hazırlaşır.
“Mən bilirəm ki, Paşinyanla (Ermənistanın baş naziri) görüş proseduru var və mən ona həbsxanada baş çəkəcəyəm. Nə bu adamın, nə də Vahe Qazaryanın (Ermənistan Daxili İşlər Nazirliyinin rəhbəri) cəsarəti yoxdur. Bu adam (Paşinyan) hər tərəfdən tükənib: həm mənəvi, həm də hüquqi cəhətdən. Velosiped sürürdün, indi haradadır həmin velosiped?” – deyə Qalstanyan kinayə ilə sual edib.
Bu arada, erməni KİV-lərinin yazdığına görə, Qalstanyanın mitinqinin bəzi iştirakçıları polis əməkdaşlarına hücum ediblər. Ermənistan Daxili İşlər Nazirliyi xəbərdarlıq edib ki, “hər hansı qanunsuz əmələ müvafiq cinayət-hüquqi qiymət veriləcək”: “Biz aksiya iştirakçılarını qanunu pozmamağa və polisin qanuni tələblərinə tabe olmağa çağırırıq”.
Son məlumata görə, Ermənistan polisi indiyədək ümumilikdə itaətsizlik aksiyasının 9 iştirakçısını saxlayıb.
Bundan başqa, polis vətəndaşların avtomobillərini Respublika meydanından xüsusi mühafizə olunan əraziyə göndərir.
**11:05
Bu gün səhər saatlarında Ermənistan polisi baş nazir Nikol Paşinyanın istefası tələbi ilə elan edilən etiraz mitinqindən əvvəl hökumət binasının qarşısına böyük qüvvələr yeridib.
Senzor.az xatırladır ki, dünən etirazçıların lideri arxiyepiskop Baqrat Qalstanyan hökumətin iclası zamanı etiraz aksiyasında iştirak etmək üçün tərəfdarlarını maşınları ilə Nazirlər Kabinetinin binası qarşısındakı Respublika meydanına gəlməyə çağırıb.
Artıq evakuatorlar İrəvanın Respublika meydanında etirazçıların maşınlarını götürməyə başlayıb. “Vətən naminə Tavuş” hərəkatının tərəfdarları meydanın perimetri ətrafında dairələri kəsiblər. Eyni zamanda polis etirazçıları saxlamağa başlayıb.
Xatırladaq ki, mayın 9-dan başlayaraq İrəvanda baş nazir Nikol Paşinyanın istefası, Azərbaycanla sərhədin delimitasiyası prosesinin dayandırılması tələbi ilə etiraz aksiyası keçirilir. Aksiyaya erməni apostol kilsəsinin Tavuş yeparxiyasının rəhbəri, arxiyepiskop Baqrat Qalstanyan başçılıq edir.
