Rusiya Xarici İşlər Nazirliyi Azərbaycandan Ukraynaya silah tədarükünün mümkünlüyü məsələsinə münasibət bildirib.

Bu barədə Rusiya XİN-in nümayəndəsi Aleksey Fadeev brifinqdə danışıb. 

Onun sözlərinə görə, azərbaycanlı tərəfdaşlara Ukraynaya silah-sursat və yaxud ikili təyinatlı humanitar yardımın göndərilməsi məsələsində Rusiyanın mövqeyi yaxşı məlumdur. 

Rusiyalı diplomat qeyd edib ki, bu addımlar dinc nizamlanmaya töhfə vermir və vəziyyəti daha da çətinləşdirir. 

“Qafqazinfo” xatırladır ki, bir neçə gün əvvəl “Caliber.az” öz mənbələrinə istinadən sözügedən məsələ barədə məlumat yaymışdı.

Bildirilmişdi ki, Rusiya Azərbaycanın maraqlarına qarşı təcavüzkar siyasətini davam etdirərsə, rəsmi Bakı Ukraynaya öz arsenalında olan silah-sursat tədarükünə qoyulan embarqonun ləğv edilməsi məsələsini nəzərdən keçirməyə başlayacaq.