Tbilisidə hazırkı mer Kaxa Kaladzenin seçki qərargahı önündə insident baş verib.

Senzor.az yerli KİV-ə istinadən bildirir ki, hakim “Gürcü Arzusu” partiyasının tərəfdarları ilə Qərbyönümlü etirazçılar arasında kütləvi dava düşüb.

Hadisə yerinə çox sayda polis qüvvəsi cəlb olunub.

Toqquşma zamanı Macarıstandan olan jurnalist ağır xəsarət alıb. O, Tbilisidə etiraz aksiyalarını mütəmadi işıqlandıran media nümayəndəsidir. Jurnalist Meliklišvili prospektində döyülüb, daha sonra təcili tibbi yardım maşını ilə Rustaveli prospektindən xəstəxanaya aparılıb.

Məlumata görə, “Gürcü Arzusu”nun gənclər qanadının üzvləri etirazçılara və jurnalistlərə hücum ediblər. Zərərçəkənlər arasında “Publika” nəşrinin əməkdaşı da var. Ona birbaşa efir zamanı hücum edilib və mobil telefonu əlindən alınıb.

Hadisə ilə bağlı Gürcüstan hüquq-mühafizə orqanlarının araşdırmaya başlayacağı gözlənilir.