Sankt-Peterburqun Krasnoselski və Petrodvortsovı rayonlarında tikinti obyektlərində aparılan profilaktik reyddən sonra 100-ə yaxın xarici vətəndaş polis bölmələrinə aparılıb. Onların yarısının iş icazələri ləğv edilib.
Senzor.az yerli KİV-ə istinadən bildirir ki, bu barədə Rusiya Daxili İşlər Nazirliyi məlumat yayıb.
Qeyd edilir ki, reyd zamanı hüquq-mühafizə orqanlarının əməkdaşları tikinti obyektlərində işləyən 300-ə yaxın miqrantı müəyyən ediblər.
"98 əcnəbi ölkədə olmalarının və işlə təmin olunmalarının qanuniliyini təsdiq edən zəruri sənədlərin olmaması səbəbindən əlavə araşdırma aparılması üçün polis bölmələrinə aparılıb. 48 miqrantın tikinti sahələrində qeyri-qanuni fəaliyyət göstərdiyi aşkar edilib. Miqrasiya Xidməti onların iş icazələrinin ləğv edilməsini nəzərdən keçirir", - deyə məlumatda bildirilir.
Məlumata görə, daha 24 əcnəbi vətəndaş isə qeydiyyat qaydalarını pozduqları üçün inzibati qaydada cəzalandırılıb. Onlardan beşini Rusiyadan deportasiya gözləyir.
