Qazaxıstan Prezidenti Kasım-Jomart Tokayev Ermənistanın yenidən Baş naziri təyin olunan Nikol Paşinyanı təbrik edib və iki ölkə arasında strateji tərəfdaşlığın inkişafına dəstəyini ifadə edib.

Senzor.az bildirir ki, Tokayevin Paşinyana ünvanladığı təbrik məktubu barədə yerli KİV-in yaydığı xəbərdə belə deyilir.

Tokayev vurğulayıb ki, Qazaxıstanda Paşinyan Ermənistanla Qazaxıstan arasında strateji tərəfdaşlığın genişləndirilməsində maraqlı olan nüfuzlu dövlət xadimi kimi qiymətləndirilir.

O, birgə səylərlə İrəvan və Astana arasında çoxtərəfli dövlətlərarası münasibətlərin keyfiyyətcə yeni səviyyəyə yüksələcəyinə əminliyini ifadə edib.

Xatırladaq ki, son parlament seçkisinin nəticələrinə əsasən, Paşinyanın rəhbərlik etdiyi "Vətəndaş Müqaviləsi" Partiyası səslərin 49,7 faizindən çoxunu qazanıb. Bu nəticə partiyaya təkbaşına yeni hökumət formalaşdırmaq imkanı verib və  Ermənistan Prezidenti Vahan Xaçaturyan avqustun 2-də Nikol Paşinyanı yenidən ölkənin Baş naziri təyin edib.