AK Parti və MHP-nin namizədi olan Numan Kurtulmuş Türkiyə Böyük Millət Məclisinin (TBMM) sədri seçilib.
Bu barədə “TRT Haber” məlumat yayıb.
Bildirilib ki, səsvermənin 1-ci turunda millət vəkillərinin 317-si onun lehinə səs verib. Bu, yetərsay olmadığı üçün sədr seçimi 2-ci tura qalıb.
2-ci turda da yetərli say olmayıb. N.Kurtulmuş bu mərhələrə 321 səs ala bilib.
Üçüncü səsvermədə isə N.Kurtulmuş eyni səslə TBMM sədri seçilib.
Qeyd edək ki, Türkiyə parlamentinin sədrliyinə partiyalar tərəfindən ümumilikdə 7 namizəd irəli sürülmüşdü. Onlar Numan Kurtulmuş (AK Parti və MHP), Tekin Bingöl (CHP), Cihan Paçacı (İYİ partiya), Şerafettin Can Atalay (Türkiyə İşçi Partiyası), Tülay Hatimoğulları Oruç (Yaşıl Sol Partiya), Mustafa Yeneroğlu (DEVA) və Serap Yazıcı Özbuddur (Gələcək Partiyası).
**20:27
Bu gün Türkiyə Böyük Millət Məclisinin (parlament) yeni sədri seçiləcək.
Senzor.az bildirir ki, parlamentin Baş Assambleyası bu məqsədlə yerli vaxtla saat 14:00-da toplanacaq.
Səsvermə gizli olacaq.
İlk iki turda namizədlərdən birinin seçilə bilməsi üçün 400 deputatın səsi tələb olunacaq. İlk iki turda 400 səs toplanmazsa, səsvermənin üçüncü turu keçiriləcək. Bu turda parlamentin sədri seçilmək üçün 301 səs kifayət edəcək. Seçki dördüncü tura keçərsə, ən çox səs toplayan namizəd sədr seçiləcək.
Qeyd edək ki, hakim Ədalət və İnkişaf Partiyası və Milliyyətçi Hərəkat Partiyası bu posta Numan Kurtulmuşun, Cümhuriyyət Xalq Partiyası Tekin Bingölün, İyi Partiya isə Cihan Paçacının namizədliyini irəli sürüb.
