“Rusiya Federasiyası və Türkiyə prezidentləri Vladimir Putin və Rəcəb Tayyib Ərdoğan arasında görüş tarixi diplomatik kanallar vasitəsilə razılaşdırılır və lazım gələrsə, liderlər hər zaman telefonla danışa bilərlər”.

Senzor.az yerli KİV-ə istinadən bildirir ki, bunu Rusiya Prezidentinin mətbuat katibi Dmitri Peskov jurnalistlərə açıqlamasında deyib.

“Putinlə Ərdoğan arasında hər zaman ünsiyyətə ehtiyac var və siz bilirsiniz ki, onların görüşəcəyi ilə bağlı razılıq var. Putinin özü isə “Mən Türkiyəyə gələcəm” deyib, biz sadəcə vaxtı seçəcəyik. Dəqiq tarix hələ ki seçilməyib, diplomatik kanallarla razılaşdırılacaq və gec-tez bu ünsiyyət baş tutacaq”, - Kreml nümayəndəsi bəyan edib.

O, bu cür təmasları ilk növbədə Rusiya Federasiyası ilə Türkiyə arasında ikitərəfli münasibətlər baxımından mühüm adlandırıb.