Azərbaycan, İran və Rusiyanın nümayəndələri Şimal-Cənub beynəlxalq nəqliyyat dəhlizi çərçivəsində yükdaşımaları üzrə işçi qrupun yaradılması barədə razılığa gəliblər və Rusiya – Azərbaycan və Azərbaycan – İran sərhədlərində sərhəd və gömrük terminallarına baxış keçiriblər.

TASS bildirir ki, bu barədə ekspertlərin işçi qrupunun yaradılmasına həsr edilmiş görüşündə Rusiyanın nümayəndə heyətinin tərkibində iştirak etmiş Dağıstan hökumətinin Rusiyanın İrandakı ticarət missiyasındakı nümayəndəsi Andrey Tanayev məlumat verib.

“Biz Dərbənddə Rusiya, Azərbaycan və İran nümayəndə heyətləri arasında ekspertlər səviyyəsində üçtərəfli görüş keçirdik və “İran Astarası”, “Azərbaycan Astarası”, “Cənub Azərbaycan Astarası”, “Tagirkent-Kazmalyar”, “Yaraq-Kazmalyar” məntəqələrinin daxil olduğu gömrük və sərhəd məntəqələrinə baxış keçirdik”, – agentliyin həmsöhbəti deyib.

O qeyd edib ki, İran tərəfi ilə bu görüşün keçirilməsi ilə bağlı razılaşmalar 2024-cü ilin fevralında Rusiya baş nazirinin müavini Aleksandr Novakın və İslam Respublikasının neft naziri Cavad Oucinin sədrliyi ilə Tehranda keçirilən ticarət-iqtisadi əməkdaşlıq üzrə Rusiya-İran hökumətlərarası komissiyası zamanı əldə olunub.

“Biz Azərbaycan tərəfi ilə ikitərəfli qaydada razılığa gəldik”, – Tanayev əlavə edib. O qeyd edib ki, “üçtərəfli görüşdən əvvəl biz Rusiya Federasiyası və İran nümayəndələri arasında ümumi xarakterli məsələlərin müzakirə olunduğu danışıqları da təşkil etmişik”.

Tanaev yükdaşıma məsələlərinin həlli üzrə üçtərəfli ekspert qrupunun iclasının “demək olar ki, on ildə ilk dəfə keçirildiyini” vurğulayıb.

Agentliyin həmsöhbətinin sözlərinə görə, ekspertlər səviyyəsində keçirilən görüşdə hər tərəfdən 9 nəfər olmaqla ümumilikdə 27 nəfər iştirak edib.