Türkiyə Prezidenti Rəcəb Tayyib Ərdoğan yay aylarında respublikanın terror təşkilatlarına qarşı daha qəti əməliyyatlar həyata keçirə biləcəyini söyləyib.
“Haber Global”ın məlumatına görə, o, Ankarada polis akademiyasında çıxış edərkən bunun təkcə Türkiyə ərazisi ilə deyil, həm də İraq və Suriya ilə bağlı olduğunu açıq şəkildə ifadə edib.
"Biz separatçı terror təşkilatlarına qarşı 40 illik mübarizəni tarixə yazdırmaq niyyətindəyik. Əsgərlərimizin, polisimizin və jandarmamızın böyük səyləri ilə biz bu təşkilatı sərhədlərimiz daxilində hərəkət etmək imkanından məhrum etdik, Suriya və İraqda 2 525 terrorçunu zərərsizləşdirdik, 3 057 mağara, sığınacaq və anbarı məhv etdik. Ümid edirəm ki, bu yay aylarında terrorçulara qarşı daha da qətiyyətli və effektiv əməliyyatlar həyata keçirəcəyik", - deyə Ərdoğan vurğulayıb.
O qeyd edib ki, terrorla mübarizə ölkə üçün təhlükə yaradan sonuncu terrorçuya qədər davam edəcək.
