Fransanın qərbində yerləşən La Roşelle liman şəhərində ətraf mühitin müdafiəçiləri və kiçik fermerlərlə polis arasında böyük qarşıdurma yaranıb.

Senzor.az yerli KİV-ə istinadən bildirir ki, fermer və ekologiya mühafizəçiləri kütləvi suvarma su anbarlarının tikintisinə etiraz edirlər.

Polis hər biri 2 min nəfərdən ibarət iki yürüşdə iştirakçıların üzərinə hücum edib. Etirazçılar zibil qutularından barrikadalar qurublar.

Onlar daha sonra zibil qutularını yandıraraq polislərə qarşı döyüşə başlayıblar. Polis gözyaşardıcı qazdan istifadə edib. Bir neçə mağaza, avtobus dayanacaqları və reklam lövhələri zədələnib və ya talan edilib.

Şarent departamentinin polis prefekti Bris Blondel brifinqdə bildirib ki, qarşıdurma zamanı dördü polis əməkdaşı olmaqla azı 9 nəfər yaralanıb.

“Hüquq-mühafizə orqanlarının əməkdaşları arasında dörd yaralı var, üçü yüngül xəsarət alıb”, - deyə Blondel vurğulayıb. Nümayişçilər tərəfindən ən azı beş nəfərin yaralandığı, hamısının yüngül xəsarət aldığı bildirilib.

Lakin Blondel qeyd edib ki, yaralıların faktiki sayını təxmin etmək çətindir, çünki nümayişçilər, xüsusən də iğtişaşlarda iştirak edənlər heç də həmişə yerindəcə tibbi yardıma müraciət etmirlər.

Günün sonuna qədər 7 nəfərin həbs edildiyi bildirilib.

Bir neçə ailə də daxil olmaqla 3000-ə yaxın insanın iştirak etdiyi ikinci, daha dinc yürüş şəhərin mərkəzindən ticarət limanına doğru hərəkət edib.