Bakı Ağır Cinayətlər Məhkəməsində Trend Beynəlxalq İnformasiya Agentliyinin direktor müavini, Baku Network analitik platformasının rəhbəri, beynəlxalq təhlükəsizlik sahəsində aparıcı siyasi şərhçi və ekspertlərdən biri olan Elçin Alıoğluna qarşı sui-qəsd cəhdi ilə bağlı cinayət işinə baxılmasına başlanılıb.
Senzor.az bildirir ki, məhkəməyə Sarıcanov Əbülfəzl Azər oğluna qarşı açılmış cinayət işi təqdim edilib. O, Azərbaycan Cinayət Məcəlləsinin 28-ci (cinayətə cəhd) və 277-ci (dövlət və ya ictimai xadimin həyatına qəsd) maddələri ilə ittiham olunur. İstintaqın məlumatına görə, təqsirləndirilən şəxs Elçin Alıoğluna qarşı hücumu əvvəlcədən planlaşdıraraq cinayətin vaxtını və detallarını diqqətlə hazırlayıb.
Bu gün hakim Səbinə Adil qızı Məmmədzadənin sədrliyi, hakimlər Eldar Hüseyn oğlu İsmayılov və Subhi Sabir oğlu Hüseynovun iştirakı ilə keçirilən hazırlıq iclasında tərəflərin mövqeləri dəqiqləşdirilib və işin gələcək araşdırılma qaydası müəyyən edilib.
İlkin məlumatlara görə, istintaq müəyyən edib ki, sui-qəsdin motivi birbaşa jurnalistin peşə fəaliyyəti ilə bağlıdır. Elçin Alıoğlu anti-Azərbaycan informasiya kampaniyalarını və Bakıya qarşı yönəlmiş geosiyasi manipulyasiyaları ifşa edən analitik yazıları ilə tanınır.
Elçin Alıoğlu həm Azərbaycanda, həm də ölkə hüdudlarından kənarda tanınmış fiqurdur. Onun analitik araşdırmaları enerji təhlükəsizliyindən tutmuş Cənubi Qafqazın postmüharibə quruluşuna, eləcə də Azərbaycana qarşı ideoloji təzyiq mexanizmlərinə qədər geniş mövzuları əhatə edir. O, dəfələrlə xarici QHT-lərin və media strukturlarının fəaliyyətini tənqid edərək, təhrif olunmuş narrativlərin yayılmasına qarşı çıxıb və ölkədə informasiya suverenliyinin, media gigiyenasının gücləndirilməsinə çağırıb.
Ekspertlərin fikrincə, E.Alıoğlunun həyatına edilən sui-qəsd müstəqil Azərbaycan jurnalistikasını qorxutmaq cəhdi kimi görünür. Bu hadisə informasiya məkanının ideoloji mübarizə arenasına çevrildiyi dövrdə xüsusi diqqət doğurur.
Növbəti məhkəmə iclası yaxın günlərdə keçiriləcək. Gözlənilir ki, proses zamanı sifarişçilər və cinayətin həqiqi motivləri ilə bağlı əlavə materiallar təqdim ediləcək.
