Sentyabrın 7-də Gürcüstanın qərbində yağan güclü leysan yağışlarının yaratdığı torpaq sürüşməsi nəticəsində itkin düşmüş 3 nəfərdən birinin – azyaşlı uşağın cəsədi tapılıb.

Bu barədə Gürcüstanın Daxili İşlər Nazirliyi məlumat yayıb.

Bildirilir ki, həlak olan uşaq Quriya rayonunun Djumati kəndinin sakinidir.

Xilasedicilər daha iki nəfərin axtarışlarını davam etdirirlər. Onların da biri azyaşlıdır.

Laqodexidə isə küləyin aşırdığı ağac bir qadının üstünə düşüb. Qadın xəstəxanaya yerləşdirilib, vəziyyəti ağırdır.

Qeyd edək ki, avqustun 3-də yağan güclü leysan yağışları nəticəsində Gürcüstanın Oni bələdiyyəsinin Şovi kurort zonasında da torpaq sürüşməsi baş vermişdi. Nəticədə kurort zonası və ətrafdakı bir neçə yaşayış massivi tam dağılmış, 31 nəfər ölmüşdü. İtkin düşmüş 2 nəfərin axtarışları isə hələ də davam edir.

**10:27

Güclü yağışlar Gürcüstanın Quriya və Acarıstan regionlarında torpaq sürüşməsinə səbəb olub.

Senzor.az yerli KİV-ə istinadən bildirir ki, məlumatı Gürcüstan Daxili İşlər Nazirliyi yayıb.

Bildirilib ki, qurumun bölmələri fəlakət bölgəsinə səfərbər ediliblər və hazırda sürüşmə nəticəsində itkin düşdüyü bildirilən üç nəfərin axtarışları davam etdirilir. Məlumata görə, itkin düşənlərdən ikisi azyaşlıdır.

Qeyd olunub ki, Quriya və Acarada güclü yağışlar həmçinin daşqınlara səbəb olub, DİN-in 112 “qaynar xətt”inə 100-dən çox yardım çağırışı daxil olub.

Yağış səbəbilə yaşayış evlərinin su altında qaldığı, ağacların qırıldığı, torpaq uçqunu səbəbilə Quriya regionunun bəzi kəndləri ilə əlaqənin kəsildiyi qeyd olunub.

Sinoptiklərin məlumatına görə, sentyabrın 8-də yağıntıların intensivliyi zəifləyəcək, sentyabrın 9-dan sentyabrın 10-u səhərədək isə Qərbi Gürcüstanın əksər rayonlarında və ölkənin şərq rayonlarının bəzi ərazilərində yenidən intensiv olacağı, şimşək çaxacağı, dolu düşəcəyi gözlənilir. Qərbdən güclü küləyin əsəcəyi də istisna deyil. Dənizdə 3-4 ballıq tufan ola bilər.