İstintaq təcridxanasında saxlanılan keçmiş deputat, sahibkar Nazim Bəydəmirlinin səhhəti pisləşib.
Turan bildirir ki, bu barədə Facebook-da onun xanımı Fəridə Bəydəmirli yazıb.
Onun sözlərinə görə, martın 1-də təcili elektrokardioqram və exokardioqram müayinəsi aparıblar. "Həkim ona impulsiv ürək blokunun ikinci mərhələyə qədəm qoyduğunu bildirib. O, təcili qanvermənin və nəticədən asılı olaraq müalicə təyin olunmasının vacibliyini qeyd edib", - Fəridə Bəydəmirli bildirib.
Lakin Bəydəmirli nəticələrə etibar edə bilməsi üçün analizlərin ailəsinin seçdiyi laboratoriyada aparılmasına israr edir.
Bundan öncə, fevralın 19-da Penitensiar Xidmətin həkimləri Bəydəmirlini müayinə ediblər və ona qan analizi verməyi təklif ediblər. Ancaq o xahiş edib ki, onu etibar etdiyi həkimlər müayinə etsinlər.
Bununla əlaqədar Bəydəmirlinin vəkili Penitensiar Xidmətin rəhbərliyinə və Ombudsmana müraciət edib. Müdafiə tərəfi həbs yerlərinin daxili intizam qaydalarının 27.6-cı maddəsinə istinad edir ki, bu da məhkumun öz seçdiyi mütəxəssis tərəfindən və öz hesabına müayinə edilməsinin mümkünlüyünü nəzərdə tutur.
Xatırladaq ki, Nazim Bəydəmirli 2023-cü il iyulun 4-də Daxili İşlər Nazirliyi Mütəşəkkil Cinayətkarlıqla Mübarizə Baş İdarəsi tərəfindən saxlanılıb. Ona qarşı Azərbaycan Cinayət Məcəlləsinin 182.2.4-cü maddəsilə (xeyli miqdarda əmlaka sahib olmaq məqsədilə hədə-qorxu ilə tələb etmək) ittiham irəli sürülüb. Ertəsi gün məhkəmə onu 4 ay müddətinə həbs edib.
Sentyabrın 1-də Bəydəmirliyə qarşı Cinayət Məcəlləsinin 182.2.2-ci maddəsilə (hədə-qorxu ilə təkrar tələb etmə) daha bir ittiham irəli sürülüb.
Vəkilin sözlərinə görə, bu ittiham guya 1996-cı ildə Rusiya Federasiyasının Lipetsk şəhərində Bəydəmirlinin təhdid yoluyla kimdənsə pul tələb etməsinə əsaslanır. Vəkil həm mahiyyət etibarilə, həm də iddia müddətinin keçməsilə əlaqədar ittihamın əsassız olduğunu deyib.
