Birinci Qarabağ müharibəsində itkin düşən şəhid Rəşadət Piriyev dəfn olunub.
Senzor.az bildirir ki, şəhidlə keçirilən vida mərasimindən sonra o, Bərdə rayonunun Yeni Daşkənd kənd qəbiristanlığında torpağa tapşırılıb.
Dəfn mərasimi N saylı hərbi hissənin hərbi orkestrinin müşayiəti ilə təşkil edilib. Şəhidin xatirəsinə ehtiram əlaməti olaraq yaylım atəşi açılıb.
Mərasimdə rayon ictimaiyyətinin nümayəndələri, şəhidin ailə üzvləri, döyüş yoldaşları və hüquq-mühafizə orqanlarının əməkdaşları iştirak ediblər. Şəhidin tabutunun üzərindəki Azərbaycan bayrağı qardaşına təqdim olunub.
Qeyd edək ki, Rəşadət Piriyev 1992-ci ildən 701 saylı hərbi hissənin 5-ci Bərdə taborunda xidmət edib. O, Laçın, Ağdam və Kəlbəcər istiqamətlərində gedən döyüşlərdə iştirak edib.
Rəşadət Piriyev 1994-cü ilin fevral ayında Kəlbəcərin Qızılqaya istiqamətində gedən döyüşlər zamanı itkin düşüb. 2025-ci ildə döyüş yoldaşlarının iştirakı ilə aparılan axtarışlar nəticəsində onun nəşi şəhid olduğu ərazidə aşkarlanıb.
