Elektrik cərəyanı vurması səbəbindən xəstəxanada dünyasını dəyişən Manisa bələdiyyəsinin sədri Ferdi Zeyrek dəfn edilib.

Senzor.az yerli KİV-ə istinadən bildirir ki, bələdiyyə rəhbərinin dəfnində minlərlə insan iştirak edib.

Məlumata görə, dəfn mərasiminə qatılanlar arasında müxtəlif partiyalardan olan millət vəkilləri, bələdiyyə sədrləri də olub.

Cümhuriyyət Xalq Partiyasının (CHP) lideri Özgür Özel “qardaşım” dediyi Zeyreki qəbiristanlıqda öz əlləri ilə dəfn edib. Bələdiyyə rəhbərinin ölümündən dərin kədərlənən CHP sədri sosial media hesabından bu sözləri deyib: “Bu gün Manisa övladını dualarla, qərənfillərlə, göz yaşları ilə yola salır...Türkiyənin hər yerindən gələn vətəndaşlarımızla, on minlərlə həmvətənimizlə hər kəsin sevgisini qazanan Ferdi Zeyreklə vidalaşdıq. Əzizimiz Ferdimizi son səfərində tək qoymayan, dərdimizə şərik olan, gələ bilməsələr də duaları ilə yanımızda olan hər kəsə sonsuz təşəkkürümü bildirirəm”.