Gürcüstanda soydaşlarımızın yığcam yaşadıqları Marneuli rayonunda “Narkomaniyaya yox deyirik” adlı aksiya keçirilib.
Azərtac xəbər verir ki, əvvəlcə Marneuli bələdiyyəsinin Araflı kəndindən olan bir qrup sakin meriya binasının qarşısında etiraz aksiyası keçirib.
Sonra rayon sakinləri də aksiyaya qoşulub və yerli hakimiyyətdən narkotika alverinə qarşı mübarizəni gücləndirməyi tələb ediblər.
Araflı kəndinin sakinləri bildiriblər ki, son vaxtlar kənddə narkotik vasitələrin satışı artıb, gənclər arasında asılılıq halları çoxalıb. Vəziyyət artıq dözülməz hal alıb və aidiyyəti qurumlar məsələyə yetərincə diqqət yetirmirlər.
Etirazçılar hüquq-mühafizə orqanlarını və yerli rəhbərliyi dərhal hərəkətə keçməyə çağırıb, narkotik alverçilərinə qarşı sərt tədbirlərin görülməsini və kənddə təhlükəsizliyin təmin edilməsini tələb ediblər.
